Депутат Нартай Аралбайұлы өзінің фейсбуктегі парақшасында қоғамда резонанс тудырған заң талаптары туралы жазды, деп хабарлайды Alash.KZ.
Депутат таксистердің тағдырымен ойнайтын Заңның тоқтатылғанын айтты. Сонымен бірге, көлікті 5 минуттан артық оталдырған адамдарға салынатын айып туралы шешімнің қайта қаралатынын, уәкілетті министрліктің мақұлдағанын жазды.
Жолаушыларды автомобильмен тасымалдау саласындағы мемлекеттің міндеттерін өзін-өзі реттеу ұйымына беру, жекеменшік СРО-ға тастай салу үлкен қателік! Осы шикі қадамды көздеген заң жобасы Мәжіліске келген еді. Біз бірден қарсы болдық.Екі себебі бар:Бірінші, Заң жобасы өзін-өзі реттеу ұйымдарына жолаушылар тасымалындағы тарифті белгілеу, бағаны реттеу құзыреттерін бермек.Бұл қате. Құрылуы мүмкін өзін-өзі реттеу ұйымдары азаматтарымызды аямайтыны екібастан белгілі. Бұл жерде тұтас саланы жекеменшік ұжымдарға жығып беру –монополияны қолдан жасауға бағытталған қисынсыз әрекет.Екінші, Жолаушыларды автомобильмен тасымалдау саласындағы қауіпсіздік мәселелерін өзін-өзі реттеу ұйымына беру адамдардың өміріне жүрдім-бардым қараудың нақты көрінісі. Ақшаның артынан қуған жекеменшік ұйымдар қауіпсіздікке қалай болса солай қарайтыны айтпаса да түсінікті. Біздің елде де жол апаттары жыл сайын жүздеген адамның өмірін жалмайды, бұл проблеманы мемлекеттік органдар шеше алмай отырып, ақыр аяғында жолдағы қауіпсіздікті өзін-өзі реттеу ұйымына бере салу туралы шешімдері ақылды адамның әрекеті емес, деп жазды депутат.
Сонымен, Нартай Аралбайұлы аталған заң жобасы Мәжілістің мұрағатына түскенін, таксистерді өзін-өзі реттеу ұйымына кіруге, жарна төлеуге міндеттейтін заң жобасының тоқтатылғанын мәлімдеді.
Ал көлікті 5 минуттан артық оталдырып тұруға тыйым салатын министрліктің шешімін дереу өзгерту керек деген талапқа бүгін ІІМ орынбасары депутаттар тарапынан бұл нормаға қатысты ұсыныс болса, оны қарауға, қолдауға дайын екенін жеткізген.
