Қазақстанда orken.otbasybank.kz порталы бар «Тұрғын үймен қамтамасыз ету орталығы» құрылды, деп жазады Alash.kz.
Үкіметтің мәліметінше, ол бүкіл ел бойынша кезекте тұрғандардың есебін орталықтандырылған тәртіпте жүргізуге, азаматтардың деректерін автоматты түрде тексеруге, тізімдердегі қайталауларды алып тастауға және қызметкерлердің қатысуынсыз тұрғын үйді бөлуге мүмкіндік береді.
Бұл туралы Үкімет отырысында «Отбасы банкі» АҚ басқарма төрағасы Ләззат Ибрагимова мәлімдеді.
«Банк 15 мемлекеттік деректер базасына қосылған. Бұл отбасының сандық картасын жасайды. Жүйенің өзі тұрғын үйге мұқтаж адамның бөлу шарттарына сәйкес келетіндігін тексереді. Есепке қою банктің мобильді қосымшасында қолжетімді. Онда тұрғын үйді бөлуге де қатысуға болады», — деді Ләззат Ибрагимова.
Сондай-ақ, платформаға өңірлерде тұрғын үйге деген қажеттілікті болжау үшін жасанды интеллект негізінде шешімдер енгізу жоспарлануда. Сонымен қатар, азаматтарға онлайн-кеңес беру үшін ЖИ-агент іске қосылады.
