Калифорнияда балабақша тәрбиеленушілерін атып, кейін өз-өзіне қол жұмсады деп күдікке ілінген ер адам қылмысты не үшін жасағанын баяндап берді, деп хабарлайды Alash.kz.
56 жастағы Гленн Литтон оқ атқан адам ретінде танылды.
Ол Feather River жетінші күн адвентистер мектебінің аумағына кіріп, немересін мектепке қабылдау туралы кездесуге келгенін айтып, кейін қарудан оқ жаудырған.
Шерифтің айтуынша, Литтонның әрекетіне саяси себеп болған. Оның денесінде табылған жазбада ол Жетінші күн адвентистер шіркеуін палестиналықтарға жасалған “геноцид” пен “қысым”, сондай-ақ Йемендегі америкалық шабуылдар үшін кінәлағаны жазылған.
Литтон бала кезінде Paradise Adventist мектебін бітірген, мүмкін, оның туыстарының бірі кезінде Feather River мектебіне барған.
Оның ұзақ қылмыстық тарихы және психикалық денсаулыққа қатысты мәселелері болған.
Бұған ұрлық, алаяқтық және құжаттарды қолдан жасау сияқты қылмыстары үшін сотталғаны дәлел.
Алайда, ол ешқашан зорлық-зомбылық сипатындағы қылмыс жасамаған. Билік оның баспанасыз жүргенін болжайды.
Бьютт округінің шерифі Кори Хонеаның айтуынша, қылмыс орнынан “көзге көрінбейтін қару” табылған. Литтон сотталған қылмыскер болғандықтан, қаруды заңды түрде иемденуге құқығы жоқ еді.
Шерифтің мәліметі бойынша, зардап шеккендер — алты жастағы Роман Мендес пен бес жастағы Элиас Вулфард — ауыр халде, бірақ тұрақты жағдайда.
Құрбандар мен олардың отбасыларына көмектесу үшін краудфандинг беттері ашылды.
Элиас Вулфардтың жағдайына арналған Gofundme парақшасында шабуылшы атқан оқтардың кеуде мен іш аймағынан өтіп, бірнеше органды зақымдап, кейін сыртқа шыққаны жазылған.
Элиас ауыр жарақат алғандықтан, тікұшақпен жергілікті ауруханаға жеткізілді. Қазіргі уақытта ол жасанды тыныс алу аппаратына қосулы және операция күтіп отыр.
Роман Мендеске арналған GiveSendGo парақшасында оның жарақаттары туралы нақты ақпарат жоқ, тек оның ауыр жағдайда екені айтылған. KCRA агенттігінің мәліметінше, оның ішкі ағзалары зақымданған.
