2027 жылғы 1 қаңтардан бастап Қазақстанда жасына байланысты және еңбек сіңірген жылдары үшін төленетін зейнетақы төлемдерінің мөлшерін 8,5 пайызға арттыру жоспарланып отыр, деп хабарлайды Alash.kz.
Еңбек және халықты әлеуметтік қорғау министрлігінің Informburo.kz сайтына берген ресми жауабына сүйенсек, 2026 жылғы 1 тамыздағы жағдай бойынша елдегі жиынтық зейнетақының орташа мөлшері 197 446 теңгені құраған. Оның ішінде ынтымақтасты зейнетақы – 103 389 теңге, базалық зейнетақы – 54 034 теңге, ал Бірыңғай жинақтаушы зейнетақы қорынан төленетін жинақтаушы зейнетақы – 40 043 теңге деңгейінде белгіленді. Сондай-ақ 2026 жылы жиынтық зейнетақының ең төменгі мөлшері 104 645 теңгеге жетсе, ең жоғары төлем 238 412 теңгені құрап отыр.
Республикалық бюджет туралы заң жобасына сәйкес, 2027 жылғы 1 қаңтардан бастап базалық зейнетақының ең жоғары мөлшерін ең төменгі күнкөріс деңгейінің 118 пайызынан 120 пайызына дейін арттыру көзделген. Осы орайда ең төменгі күнкөріс деңгейі қазіргі 50 851 теңгеден 55 173 теңгеге дейін өседі деп болжануда. Ведомство өкілдері келесі жылға қатысты есептеулермен бөлісті.
«Алдын ала болжамдар бойынша, келесі жылы төлемдердің орташа мөлшері: ынтымақтасты зейнетақы – 111 640 теңгені, базалық зейнетақы – 59 100 теңгені құрайды. Осылайша, БЖЗҚ-дан төленетін жинақтаушы компонентті есепке алмағанда, зейнетақы төлемдерінің жиынтық орташа мөлшері шамамен 170 740 теңге болады», — деп есептеді Еңбек және халықты әлеуметтік қорғау министрлігі.
Қоғамдық талқылау барысында азаматтар тарапынан 8,5 пайыздық өсімнің қайдан шыққаны туралы сұрақ қойылған болатын. Зейнетақы жүйесін 2030 жылға дейін әрі қарай модернизациялау тұжырымдамасы бойынша жыл сайынғы индекстеу инфляция қарқынынан екі пайыздық тармаққа озық жүргізілуі тиіс. Ұлттық экономика министрлігі 2027 жылға арналған инфляция деңгейін 7,5-9,5 пайыз аралығында болжап отырғандықтан, индексация көрсеткіші осы аралықтың орташа деңгейіне сай белгіленген.
«Бюджет кодексіне сәйкес, республикалық бюджет жыл сайын әлеуметтік-экономикалық даму болжамын ескере отырып әзірленеді. Соған сәйкес инфляция деңгейі 7,5-9,5 пайыз деп айқындалды, осыған байланысты 2027 жылғы 1 қаңтардан бастап зейнетақы төлемдерін 8,5 пайызға арттыру жоспарлануда. Базалық зейнетақы мөлшері ең төменгі күнкөріс деңгейінің өзгеруіне байланысты өседі. Ал Бірыңғай жинақтаушы зейнетақы қорынан төленетін төлемдер жыл сайын 5 пайызға индекстеледі», — деп жауап берді министрлік өкілдері.
Егер инфляция деңгейі болжамнан асып кетсе, зейнетақыны жылына екінші рет қайта индекстеу мүмкіндігіне қатысты министрлік өкілдері мұндай тәжірибенің 2022 жылы сәтті қолданылғанын еске салды. Ол кезде төлемдер 1 қаңтарда және 1 сәуірде екі кезеңмен арттырылып, инфляция дәлізінің өзгеруіне байланысты қосымша 4 пайыз қосылып, жылдық өсім 11 пайызға жеткізілген болатын.
