Бразилияда 37 жастағы әйел өзін бала ретінде танытып, отбасыларды алдап келген, деп хабарлайды Alash.kz.
Бразилия құқық қорғау органдары өзін 11 жасар бала ретінде танытып, асырап алушы отбасының сеніміне кірген 37 жастағы әйелді ұстады. Күдікті бұл айласын бір жылдан астам уақыт бойы жүзеге асырып келген.
Ресми мәліметтерге сәйкес, оқиға 2025 жылдың көктемінде Жоинвили қаласындағы діни қауымдастықтардың бірінде басталған. Қауымдастыққа келген әйел сырт келбетінің ересектігіне қарамастан, өзінің жасы 11-де екенін және үйдегі зорлық-зомбылықтан қашып шыққанын мәлімдеген. Кейінірек өзін «Габриэле» деп таныстырған қызды осы қауымдастық мүшелерінің бірі өз қамқорлығына алып, отбасына қосқан.
Әйел өз бейнесін шынайы көрсету және айналасындағыларды сендіру үшін бірнеше айла-шарғы қолданған. Ол өзінің ересек адамға ұқсайтын дене бітімін бала күнінде қабылдаған мәжбүрлі гормондық терапиямен түсіндірген. Сондай-ақ өзіне «аутизм» диагнозын қойған.
Үй ішінде үнемі қуыршақтармен ойнап, балаларға тән суреттер салған және мінез-құлқын барынша инфантильді (балалық) деңгейде ұстаған.
Жаңа отбасы оған жеке бөлме беріп, өзге балаларымен тең дәрежеде қарап, материалдық және моральдық қолдау көрсеткен.
Асырап алушы отбасы туыстарының бірінде күдік туындап, жеке тексеріс жүргізген. Нәтижесінде «Габриэленің» бұған дейін Рио-де-Жанейро қаласында дәл осындай сценарий бойынша әрекет еткені анықталып, полицияға хабар берілген.
Ұстау шараларынан кейін күдікті өз кінәсін толықтай мойындап, шынайы аты-жөнін көрсетті. Полицияның болжамы бойынша, бұл әйел бұған дейін еліміздің басқа өңірлерінде кем дегенде бес отбасының сеніміне кіріп, заңсыз әрекеттер жасаған болуы мүмкін.
Қазіргі уақытта күдіктіге қатысты іс сотқа жолданды. Оған алаяқтық және өзге де құқық бұзушылық баптары бойынша айып тағылуда. Тергеу амалдары жалғасып жатыр.
