"Хуторлықтар" қылмыстық тобының басшысы делінген Хасан Қасымбаевтың Парламентте туысының бары расталды, деп жазады Alash.KZ.
Сенатор Жанболат Жөргенбаев бұл шындық екенін мойындаған, бірақ ол Хасан мен оның ағаларына ешқандай көмек көрсетпедім дейді.
"Ол маған алыс туыс екенін растай аламын. Облыстағы басқа да тұрғындар сияқты. Өздеріңіз білетіндей, қазақта туыс көп. Бірақ біз үнемі байланыста болған жоқпыз. Ең көп дегенде, үлкен отбасылық тойда немесе жерлеу рәсімінде кездесуіміз мүмкін.
Талғар ауданы аппаратының бұрынғы басшысы Аслан Қасымбаевтың өз қызметін сақтап қалуы үшін ешкімге жүгінбегенімді және ешқандай қадам жасамағанымды ресми түрде мәлімдегім келеді. Сонымен қатар, мен Хасан Қасымбаевқа қатысты тергеу барысына еш ықпал жасауға тырыспадым, – дейді ол.
Ulysmedia.kz жазғандай, Алматы облысынан сайланған сенатор Жанболат Жөргенбаев Кеген ауданы Қарқара ауылында туған. Талғар ауданы Алматы мал бордақылау кеңшарының инженері, жылутехнигі, ауылшарушылық дақылдарын өсіру бригадирі, аға инженері болып еңбек жолын бастаған. Әр жылдары Қапшағай қаласы әкімінің бірінші орынбасары, Қарасай ауданы Қаскелен қаласы әкімінің орынбасары, «Идиль-Ақсу» ЖШС-ң жоба жетекшісі, «Ақсу» АҚ вице-президенті, «Қарасай Құрылыс» ЖШС бас директоры, «Nur Otan» партиясы Алматы облыстық филиалы төрағасының бірінші орынбасары қызметтерін атқарған.
