Ұлыбританияда 38 жыл түрмеде отырған ер адамның үкімі жаңа деректер шыға салысымен жойылды, деп хабарлайды ALASH.KZ.
Апелляциялық сот оның ісіне қатысты жаңа ДНҚ сараптамаларының нәтижелерінен кейін үкімнің күшін жойды.
Питер Салливан соттың жаңа шешімін естіген кезде аузын қолымен жауып, жылауға дайын тұрғандай көрінді – ол көп жылдар бойы өз кінәсіздігін дәлелдеуге тырысып келген.
Солтүстік Англиядағы Уэйкфилд түрмесінен видеобайланыс арқылы сот отырысына қатысқан Салливан өз мәлімдемесінде ешкімге ренішінің жоқ екенін айтып, жақындарымен кездесуді асыға күтіп жүргенін жеткізді.
«Құдай куә, шындық адамды азат етеді делінген. Өкінішке қарай, маған жасалған әділетсіздіктің қашан шешілетіні ол жерде жазылмаған. Мен ашулы да, ызалы да емеспін», – деп оқып берді оның мәлімдемесін адвокаты.
Адвокат Сара Майетт сотта Салливанның – Ұлыбританияда әділетсіз үкіммен ең ұзақ түрмеде отырған адам екенін атап өтті.
68 жастағы Салливан 1987 жылы Ливерпульге жақын Бебингтон қаласында Дайан Синдаллды өлтірді деп сотталған.
21 жастағы Синдалл – гүл сатушы, тұрмысқа шығуға дайындалып жүрген. 1986 жылдың тамыз айында пабтағы қосымша жұмысынан үйіне қайтып келе жатқанда, фургонының отыны бітіп қалған. Оны соңғы рет түнгі уақытта жол бойында келе жатқанда көрген. Оның денесі шамамен 12 сағаттан кейін аллеядан табылған. Қыз сексуалдық зорлық көріп, қатыгездікпен соққыға жығылған.
Ол кезде денеден табылған шәуһатты зерттеу мүмкін болмаған. Алайда 2024 жылы жүргізілген сараптама шәуһаттың Салливанға тиесілі емес екенін көрсетті, деді қорғаушы Джейсон Питтер.
«Айыптау тарапы бұл қылмысты бір адам жасады деп санайды. Жәбірленушіге сексуалдық зорлық жасаған – бір адам. Енді дәлелдер бұл адамның айыпталушы болмағанын көрсетіп отыр», – деді адвокат.
Прокурор апелляцияға қарсылық білдірмеді және егер ДНҚ дәлелдері тергеу кезінде қолжетімді болғанда, Салливан ешқашан айыпталушы ретінде танылмас еді деп мәлімдеді.
Мерсисайд полициясы бұл істі қайта тергеп жатқанын және қылмыскерді табу үшін бар күшін салатынын айтты.
Бұған дейін АҚШ-тың Оклахома штатында ер адам 50 жылға жуық уақыт бойы қылмыс жасамағаны анықталған соң ақталып шыққан болатын. Бұл – АҚШ тарихындағы ең ұзақ мерзім түрмеде отырып, кейін ақталған жағдай ретінде тіркелді.
