"Бүркіт" есімімен елге танылған әнші Айбек Жансейітов жары Аишаның не себепті қазақ тілінде сөйлемейтіні туралы айтып, қазақша сөйлегісі келмейтінін жеткізді, деп хабарлайды Alash.kz ұлттық порталы деп KYN.KZ ақпарат агенттігіне сілтеп.
Өнер иесі әйелінің ерекше қасиетін атап өтті. Бұл “Сырласу” бағдарламасында ашып айтты.
“Негізі табысымыз бірдей. Өнерде қатар жүргесін ақшаны бірге табамыз. Жақында Аиша анасына көлік сыйлады. Халық та әлі шулап жатыр-ау. Сол туралы айтып берейін. Аиша мен анасы Қарағандыға кетіп қалғанда сыйлықты мен дайындап қойғанмын. “Сен өзің бере бер, анаң қуанып қалады” деп едім, үзілді-кесілді бас тартты. Өйткені өтірік айта алмайды. Басқа біреу болса: “Анама мен сыйлап жатырмын” деуші еді. Түрлі парақшаларға салып, мақтанып айтатын еді. Сондай болмысымен мені қатты таңғалдырады. Күн сайын осындай әйел болғанына тәуба деймін. Құдайдан сұрап алған әйелім”, – деп ағынан жарылды әнші.
Сонымен қатар әйелінің қазақ тілін әлі үйренбегенін, сөйлегісі келмейтінін жеткізді.
“Тағы тіл үйрену туралы сұрақ алдымыздан шықты. Мен әлсіз болып тұрмын. 10 жылдан астам уақыт бірге келе жатырмыз. Қазақша түсінеді, бірақ сөйлегісі келмейді. Бір жылдан бері ата-анамызды қолымызға алдық. Олар таза қазақша сөйлейді. Балалардың да тілі қазақша шықты. Аиша қазақ тілін балаларынан үйреніп жүр. Кейде әкем орысша сөйлеп қояды. Сондай кезде тыйып тастаймын. Бірақ Аишаның өзіне қысым көрсетіп, талап етпеймін”, – деген еді Бүркіт.
