Актер Шәріп Серіктің сүйіктісі Әлия Ботееваны соққыға жыққаны хабарланды, – деп жазды Alash.KZ Aikyn.kz порталына сілтеп.
Бұл туралы Әлия Ботеева Instagram парақшасында жазды. Оның айтуынша, сүйген адамының өзіне қол көтеруі - үш ұйықтаса түсіне кірмеген жағдай. Ол махаббаттан басталған сезім күш көрсетумен аяқталғанына өкініш білдірді.
Қыз жариялаған бейнежазбада Шәріп Серіктің қызды жеделсатыдан жұлқылап шығарғаны анық көрінеді.
«Физикалық жағынан әлсіз болсам да, мораль тұрғысынан қабылдауға болмайтын нәрсені айтпай, үндемей қоя салатындай әлсіз адам емеспін. Мен өзімді және өз абыройымды қорғауға мәжбүрмін. Менің ойымша, кесіп өтуге болмайтын шекаралар болады», - деп жазды Әлия Ботеева.
Сонымен қатар, Әлия Ботеева шындықты ашып айту қажет деп санайтынын жеткізген. Ол өз басынан өткен жағдайдың психологиялық зардаптарына қарамастан осындай тоқтамға келген:
«Егер мен бұл фотолар мен видеоны жарияламасам, ең алдымен өзімді және отбасымды сатқан боламын», - деген ол осындай жағдайға тап болуы мүмкін басқаларға қолдау көрсетудің маңызды екенін айтты.
Белгілі кктердің сүйіктісі шынайы сүйіспеншілікпен басталған қарым-қатынастың зорлық-зомбылыққа ұласқанына өкініш білдірді. Мұндай жағдайды жасырын ұстаудың қажеті жоғын баса айтты:
«Мен өзімді және ар-намысымды қорғауға мәжбүрмін. Мұндай жағдайды басынан өткергендердің бәрінен бұл жағдай қалыпты емес екенін түсінуін сұрағым келеді. Шынайы сенім мен махаббаттан басталған нәрсенің осындай жағдайға айналғаны өкінішті-ақ. Осы жазбаммен айтқым келетін жалғыз нәрсе: өкінішке қарай, мен дереу арыз жазуым қажет еді, бірден қарсы шығып, шыдамауым керек еді. Қатты шошығаным сонша не болғанын аңғарып үлгере алмай қалдым», - деді Әлия Бутеева.
Алматы полиция департаментінің баспасөз қызметі болған жайтқа қатысты тергеу жүріп жатқанын хабарлады. Ал актердің өзі бұл оқиғаға қатысты түсініктеме берген жоқ.
