Мәнерлеп сырғанаудан Олимпиада шыңын бағындырған отандық спорт саңлағы Михаил Шайдоров спорт саласындағы созылмалы қаржылық дағдарыс пен бюрократиялық кедергілерді ашық айтып, әлеуметтік желіде ауқымды наразылық жазбасын жариялады, деп хабарлайды Alash.kz.
Спортшының мәлімдеуінше, ол өзінің заңды атағын ала алмай жүр және оның жаттықтырушылар құрамы бірнеше ай бойы еңбекақысыз қалған. Шайдоров бұл мәселені іштей шешуге тырысқанымен, оның айналасындағы жағдай ушығып, абыройына нұқсан келе бастағандықтан, бұл қадамға баруға мәжбүр болғанын жеткізді. Спортшы өз жазбасында спорт шенеуніктерінің тарапынан көрсетіліп жатқан қысымдар мен немқұрайлылықты ашық айтып, келесідей төл сөзімен наразылық білдірді:
«Есімімді қаралауға жол бере алмаймын. Нормативті 2025 жылы-ақ орындап қойсам да, маған осы уақытқа дейін еңбек сіңірген спорт шебері куәлігі берілген жоқ. Мен және менің командам 5 айдан бері жалақы алмай келеміз, соның кесірінен жаңа маусымға дайындығымыз іс жүзінде тұралап қалды».
Сонымен қатар, Олимпиада чемпионы жауапты тұлғалардың келісімшартқа енгізген қисынсыз әрі алдын ала орындалуы екіталай талаптарына тоқталып, спорттық құжаттардағы сауатсыздықты қатты сынға алды:
«Жаңа келісімшарттағы пункттердің бірі мүлдем ақылға сыймайды. Олар 2026 жылға арналған шарттың өзінде-ақ менен 2030 жылғы Олимпиаданың медалін талап етіп отыр».
Михаил Шайдоров бұл шулы мәселені барынша қоғам талқысына шығарғысы келмегенін, бірақ тығырыққа тірелгенін жеткізді. Ол өзінің бұл мәлімдемесі қаржы табу мақсатын көздемейтінін дәлелдеу үшін, егер мемлекет тарапынан тиісті қаражат толықтай аударылатын болса, өзінің кешіктірілген барлық бес айлық жалақысын түгелдей балаларға көмек ретінде қайрымдылыққа жұмсайтынын баса айтты.
