Шілде айында Атырау өңіріндегі су қоймаларының бірінде табиғат заңдылықтарына сәйкес бұл аймақта өсе алмайтын, Қазақстанның Қызыл кітапқа енген сирек өсімдіктің пайда болғаны туралы ақпарат тараған еді, деп хабарлайды Alash.kz.
Бірнеше күннен кейін Тасқала ауылының маңындағы Перетаска тармағында лотостардың өздігінен емес, жергілікті екі мектеп оқушысының арқасында өсіп шыққаны белгілі болды. Бүлдіршіндер гүл тұқымын қытайлық маркетплейс арқылы тапсырыспен алдырып, әуелі үйде өсіруге тырысқан. Алайда әрекеттерінен нәтиже шықпаған соң, тұқымды суға шашқан.
«Ақжайық» мемлекеттік табиғи резерватының ғылым және мониторинг бөлімінің қызметкерлері далалық зерттеулер кезінде аталған гүлдерді тауып алды. Мамандар бұл құбылысты өңірдің биоәртүрлілігінің сақталуы мен экожүйенің оң жағдайы деп бағалап, аумақты бақылауға алды.
Бұл ерекше көрініс тез арада жергілікті тұрғындар мен қала қонақтарының назарын аударды. Сирек кездесетін әдемі гүлді өз көзімен көріп, суретке түсу үшін су қоймасының басына келушілердің қатары күн санап артып келеді.
Ғалымдар өсімдіктің таза суда өсіп шыққанына қуанғанымен, экологтар бұл жағдайдың кері салдары болуы мүмкін екенін ескертеді. Бұл өңірге тән емес өсімдік су қоймасының экологиялық тепе-теңдігін бұзуы ықтимал.
Лотостың жапырақтары өте үлкен болғандықтан, ол су бетін тұтас жауып тастайды. Нәтижесінде су түбіне күн сәулесі мен ауа өтпей, басқа су өсімдіктері фотосинтез жасай алмай сола бастайды. Бұл су ішіндегі оттегінің азаюына әкеліп, балықтар мен басқа да су жәндіктерінің тұншығуына немесе басқа жаққа ауып кетуіне себеп болуы мүмкін.
Сонымен қатар күзге қарай лотостың жапырақтары мен сабақтары шіріп, су түбіне шөккенде, судың тұнықтығы бұзылып, өзеннің батпақтану процесі жылдамдайды. Жергілікті табиғатта бұл өсімдіктің көбейуін шектейтін жәндіктер болмағандықтан, ол тез таралып, жергілікті өсімдік әлемін ығыстырып тастау қаупі бар.
Мамандар лотостың су қоймасына тигізер табиғи пайдасы да бар екенін айтады. Бұл өсімдік табиғи «биофильтр» рөлін атқарып, суды ауыр металдардан, артық органикалық заттардан тазартады және су астындағы лайдың шөгуіне ықпал етеді. Тамыр жүйесі су түбін бекітіп, судың өзін тұнық әрі мөлдір ете түседі.
Дегенмен экологтар бұл жағдайды жаһандық экологиялық қауіпке жатқызбайды. Себебі лотос судан тыс жерге өздігінен тарай алмайды, ал өңірдегі суық қыс мезгілі оның табиғи түрде шамадан тыс көбейіп кетуін шектейді. Сондықтан мамандар бұл құбылысты қауіпті апат емес, тек тұрақты бақылауды талап ететін жергілікті биологиялық ерекшелік деп бағалап отыр. Егер өсімдік тым көбейіп кетсе, оны механикалық жолмен тазалау арқылы оңай реттеуге болады.
