Ұлынан айырылған Ақтау тұрғыны Жұлдыз Азанова соқыр ішекке дер кезінде дұрыс диагноз қоймаған дәрігерлердің үстінен жүргізілген Денсаулық сақтау министрлігінің ресми тексеру қорытындысын жариялады, деп хабарлайды Alash.kz.
Медициналық және фармацевтикалық бақылау комитеті баланың анасы шағымданғаннан кейін арнайы тәуелсіз сарапшыларды тарта отырып, Ақтау қалалық №2 емханасы мен Маңғыстау облыстық көпбейінді балалар ауруханасында жоспардан тыс тексеру амалдарын жүргізген.
Анықталғандай, медициналық көмек көрсету барысында бірқатар өрескел ұйымдастырушылық-тактикалық, емдеу-диагностикалық және құжаттамалық қателіктерге жол берілген. Атап айтқанда, аурухананың қабылдау бөлімінде баланың денсаулық жағдайы бірнеше рет тиісті деңгейде қаралмай, оны ауруханаға жатқызудан төрт мәрте бас тартқан, соның салдарынан жеткіншек емдеу мекемесіне тым кеш, жағдайы өте ауырлап кеткенде ырқынан тыс қабылданған. Оған қоса, мұндай сындарлы сәтте дәрігерлердің міндетті консилиумы ұйымдастырылмаған, медициналық құжаттар ереже бұзыла отырып толтырылған, ал анасының шағымдары мен науқастың нақты ахуалы толық ескерілмеген. Сондай-ақ баланы тиісті бейінді мамандарға жолдау туралы нұсқаулықтар да дер кезінде орындалмағаны белгілі болды.
Тексеріс қорытындысы бойынша Жұлдыз Азанованың арызы толықтай негізді деп танылды. Жіберілген кемшіліктер үшін аталған медициналық ұйымдар басшыларының орынбасарлары тәртіптік жауапкершілікке тартылса, Маңғыстау облыстық көпбейінді балалар ауруханасының директоры атқаратын қызметінен біржола босатылды. Мұнымен қоса, Әлеуметтік медициналық сақтандыру қоры аталған емдеу мекемелеріне қатысты экономикалық ықпал ету шараларын қолданды. Қазіргі таңда бұл дерек бойынша Ақтау қаласының прокуратурасы ҚР Қылмыстық кодексінің 317-бабы, яғни «Медицина қызметкерінің кәсіптік міндеттерін тиісінше орындамауы» бойынша қылмыстық іс тіркеп, сотқа дейінгі тергеу амалдарын жүргізіп жатыр.
