"Шаншар" театрының актері Ғалымжан Қаппаров бір сұхбатында отбасылық өміріндегі қызық оқиғаларымен бөлісті, деп хабарлайды Alash.kz.
Актердің айтуынша, төрт ұлы бар, бірақ олардың ешқайсысы өзіне ұқсамайды. Бұл туралы ол YouTube-тегі "3D әңгіме" бағдарламасында айтып берді.
"Төрт ұлым бар. Ең қызығы – олардың ешқайсысы маған ұқсамаған. Төртеуінің де өңі ашық, өзі жіңішке келген. Үйге келген кісілердің бәрі: "Балаларың саған мүлде ұқсамайды ғой" деп айта береді. Адам әр жолы сол сөзді естігенде біртүрлі күйге түседі екен.
Кейде өзім де әйелімнен күдіктенгендей болдым. Бірақ күдіктенуге еш негіз жоқ еді – ол күндіз де, түнде де жанымда. Төрт ұлдан кейін арнайы туу күнтізбесін қолданып, қыз күткенбіз. Аллаға шүкір, қазір өзімнен айнымайтын қызым бар. Өзім оны қалжыңдап "Тайсонның қыз нұсқасы" деп атаймын", – деп әзілдеді Ғалымжан Қаппаров.
