Әлеуметтік желіде «Байтақ» жасылдар партиясының Атқарушы хатшысы Қуаныш Әлібектің 15 жастағы ұлының үндеуі тарады. Жасөспірім әкесінің ресми табысы мен алимент төлемдеріне қатысты сұрақ қойып, құзырлы органдардан жағдайды тексеруді талап етті, деп жазады Alash.KZ порталы Politico.kz сайтына сілтеме жасап.
Жасөспірімнің айтуынша, ол анасы және 12 мен 10 жастағы екі қарындасымен бірге тұрады. Оның сөзінше, әкесінің ресми жалақысы айына 85 мың теңге, ал осы сомадан үш балаға шамамен 40 мың теңге алимент есептеледі.
Жасөспірім әкесінің нақты табысы бұдан жоғары болуы мүмкін деп күмән келтірді. Алайда мұны дәлелденген факт ретінде айтпайтынын арнайы атап өтті.
«Менің 2 сіңлім бар, біреуі 12 жаста, екіншісі 10 жаста. Ата-анамыз ажырасқан, біз анамызбен бірге тұрамыз. Әкеміз бізге іс жүзінде көмектеспейді және өмірімізге де араласпайды. Әкемнің аты Қуаныш Әлібек, ол "Байтақ" жасылдар партиясының қызметкері. Ол сонда жұмысқа орналасқаннан кейін ресми жалақысы айына 85 мың теңге болды. Сонымен қатар ол өзінің 3 баласына алимент бойынша қарыз», – деді ол.
Жасөспірімнің айтуынша, әкесінің әртүрлі некеден жеті баласы бар. Оның үшеуі – алғашқы некеден туған балалар, тағы екеуі соңғы некеден, ал екеуі некеден тыс дүниеге келген.
Ол алименттің 85 мың теңге ресми жалақыдан есептелетінін айтып, нәтижесінде үш балаға айына шамамен 40 мың теңге түсетінін мәлімдеді. Бұл әр балаға шамамен 13–14 мың теңгеден келеді.
Жасөспірім «Байтақ» партиясының төрағасы Азаматхан Әміртаевқа да тікелей үндеу жасап, партия қызметкерінің ресми жалақысы неге небәрі 85 мың теңге екенін сұрады. Оның сөзінше, Құрылтай сайлауы алдында олар партия басшысымен кездескен, сол кезде мәселені шешуге уәде берілген. Алайда арада екі ай өтсе де, өзгеріс болмаған.
Жасөспірім әкесінің нақты табысы ресми жалақысынан бірнеше есе жоғары болуы мүмкін деген болжам айтты. Бірақ қандай да бір «қос бухгалтерияның» барын дәлелдей алмайтынын, сондықтан мұны анықталған факт ретінде көрсетпейтінін атап өтті.
«Менің әкемнің нақты табысы осы 85 мың теңгеден 9, тіпті 10 есе жоғары болуы мүмкін деп ойлауға негізім бар. Сондай-ақ табыстың бір бөлігі ресми түрде көрсетілмеуі мүмкін деп болжаймын. Мүмкін, мен қателесетін шығармын. Қандай да бір қос бухгалтерия бар екенін дәлелдей алмаймын, сондықтан мұны анықталған факт деп айтып отырған жоқпын. Бірақ онда неге мұны ешкім тексермейді деген сұрақ туындайды», – деді ол.
Жасөспірім бұл жағдайды тек ата-аналар арасындағы дау емес, өзінің және қарындастарының өміріне қатысты мәселе деп санайтынын айтты. Ол әкесінің балалар алдындағы міндетін орындауын және оның нақты табысы адал анықталуын қалайтынын жеткізді.
Қуаныш Әлібек не деді?
Осыдан кейін Қуаныш Әлібек әлеуметтік желіде видео жариялап, ұлының мәлімдемесіне жауап берді.
Ол отбасылық жағдайды көпшілікке шығарғысы келмегенін айтып, дау заң аясында, қажет болса сот арқылы шешілетінін мәлімдеді.
«Мен отбасымыздағы жағдайды көпшілікке шығарғым келмеген еді. Бірақ ұлымның видеосы үлкен резонанс тудырғандықтан, бірнеше ауыз сөз айтуды жөн көрдім», – деді ол.
Қуаныш Әлібектің айтуынша, ұлы мен қызы шамамен үш жыл онымен бірге тұрған. Биыл қаңтарда олардың анасы балаларды өзімен бірге алып кеткен.
Ол отбасындағы жағдайды толық білетін адамдар тек өздері екенін айтып, ешкімді айыптағысы келмейтінін жеткізді.
«Мен балаларымды жақсы көремін, әрқашан оларға қамқор болып, қолымнан келгенше көмектесіп келдім. Алдағы уақытта да солай болады», – деді ол.
Сонымен бірге Қуаныш Әлібек партиядағы қызметіне қатысты да түсініктеме берді. Оның сөзінше, ол жеке кәсіпкер, ал «Байтақ» партиясымен қоғамдық еріктілік негізінде жұмыс істейді.
Ол партия төрағасы Азаматхан Әміртаев пен ұйымның отбасылық келіспеушілікке қатысы жоқ екенін айтып, балаларды әкеге қарсы қою орынсыз екенін мәлімдеді.
Әкесінің жауабына жауап:
Кейін Қуаныш Әлібектің ұлы тағы бір видео жариялады. Бұл жолы ол әкесінің өзін партия еріктісі ретінде таныстырған сөзіне күмән келтірді.
Жасөспірім әкесінің «Байтақ» партиясының еріктісі емес, заңды қызметкері екенін, қазіргі лауазымы – партия төрағасының атқарушы хатшысы екенін айтты.
Оның сөзінше, әкесімен бірге тұрған 2,5–3 жыл олардың отбасындағы жағдайға байланысты болған. Балалардың әкесімен тұруы алимент мәселесіне қатысты ата-анасының келісімімен жүзеге асқанын жеткізді.
«Біз онымен әкеміздің өз бастамасы және өтініші бойынша тұрдық, өйткені сол кезде ол алимент төлей алмады. Бұл анамыз бен әкеміздің арасындағы шешім және келісім болды», – деді жасөспірім.
Ол сол кезеңдегі отбасының тұрмысын егжей-тегжейлі жариялағысы келмейтінін айтып, кейбір мәселелер отбасы ішінде қалуы керек екенін атап өтті.
Сонымен қатар жасөспірім әкесінің партиядағы мәртебесіне қатысты сұрақ қойды.
«Қай уақыттан бері еріктілерге әлеуметтік пакет, зейнетақы аударымы, табыс салығы есептеледі және біздің алиментіміз оның жалақысынан ұсталады. Өзі ерікті екенін айтып отыр, бірақ іс жүзінде партияда ресми жұмыс істейді. Сонда мұны қалай түсінуге болады, ол ерікті ме, әлде партия қызметкері ме?» – деді ол.
Жасөспірімнің айтуынша, әкесі үш ай қатарынан алимент төлемеген. Сонымен қатар оның қайда оқуға түскенін және оқу барысын сұрамағанын мәлімдеді.
Ол алимент берешегіне қатысты сот шешімі бар екенін айтып, құқық қорғау органдарынан, қаржы полициясы, салық органдары мен прокуратурадан жағдайды тексеруді сұрады.
«Мен оқып, өз болашағымды құрғым келеді. Бірақ сот шешімінің орындалғанын, менің және қарындастарымның құқықтары сақталғанын да қалаймын», – деді жасөспірім.
Қуаныш Әлібек «Байтақ» партиясында қандай қызмет атқарады?
«Байтақ» партиясының әлеуметтік желідегі ресми ақпаратына сәйкес, 2025 жылғы 8 мамырда партияның Саяси кеңесі Қуаныш Әлібек Нұрланұлын Атқарушы хатшы лауазымына бекіткен.
Партия мәліметінше, ол 1986 жылы Қызылорда облысында дүниеге келген және экономика мамандығы бойынша жоғары білім алған. Әр жылдары жастар ұйымын басқарған, экологиялық бастамаларды үйлестірген және партия ішіндегі бақылау құрылымын басқарған.
Қазір оның отбасы ішіндегі алимент мәселесіне қатысты екі тараптың мәлімдемелері әлеуметтік желіде талқыланып жатыр. Жасөспірім нақты жағдайды құзырлы органдар тексеруі қажет екенін айтса, Қуаныш Әлібек даудың заң аясында шешілетінін мәлімдеді.
