Желіде «атыраулық хакер» ретінде танымал болған күдікті сот залында журналист Жанат Молдашеваның сұрақтарына жауап беріп, қарызға қалай батқанын және елден неліктен кетуге мәжбүр болғанын ашық айтты, деп хабарлайды Alash.kz.
Алаяқтық бабы бойынша айыпталып жатқан азамат сотта өз сөзін қорғап, бастапқыда 100 млн теңгеге жеткен берешегін еңбек етіп жүріп 13 млн теңгеге дейін қысқартқанын жеткізді. Ол инвесторлардан тартылған қаражатты жеке мақсатына жұмсамағанын, барлық қаржылық есеп ЖШС арқылы жүргізілгенін алға тартты. Алайда 2024 жылы олардың IT-өнімін өзге компания көшіріп алып, мемлекетке өз жобасы ретінде ұсынуы салдарынан стартап күйреген. Осы оқиғадан кейін қарызға батып, оны жабу үшін мейрамхана ашқанымен, ол да шығынға ұшыратқан. Нәтижесінде 2025 жылы үстінен қылмыстық іс қозғалған соң Дубайға кетуге мәжбүр болғанын жеткізген айыпталушы сотта мынадай толық төл сөзін мәлімдеді:
«Егер қаражатты қалтама басып, қашып кетсем, мен нағыз алаяқ болар едім. Бірақ мен ЖШС тіркеп, ресми есеп жүргіздім, барлық міндеттемені орындадым. 2024 жылы Цифрлық даму министрлігі Атырауға келгенде, өзге бір компания біздің әзірлемемізді көшіріп алып, мемлекетке өз жобасы ретінде ұсынды. Бұл факті ашық айтылды. Осы оқиғадан соң жобамыз тоқтап, шығынды өз мойныма алуға тура келді. Инвесторлар түсіністік танытпағандықтан, 100 миллион теңгедей қарызға баттым. Оны өтеу үшін мейрамхана ашқан едім, ол да шығынға батырды. 2025 жылы үстімнен қылмыстық іс қозғалған соң Дубайға кетуге тура келді. Шетелде жүріп жұмыс істеп, қарызды жауып, оны қазіргі айыпта көрсетілген 13 миллион теңгеге дейін азайттым».
Осылайша, ол шетелде жүріп тапқан табысымен қарызының негізгі бөлігін жапқанын атап өтті.
Ал сот процесіне қатысқан журналист Жанар Молдашова бұл іске қатысты өз көзқарасын білдіріп, бюджет қаржысын талан-таражға салған басқа да тұлғалардың неге осылай қатаң түрде ұсталып әкелінбейтініне қынжылды. Журналист әлеуметטיк желідегі парақшасында келесідей төл сөзін жазды:
«Интерполмен желкелеп жеткізгенге 200-300 млн. теңге қарызы бар деп ойлап едім. Кеше сот процесіне барып 13 млн. теңге екенін естідім. Оның 9 млн. теңгесін қайтарыпты. „Енді 4 млн.теңге қалды“ дейді. Ал, Жангелдин трагедиясындағы шу болған хронологиясына қатысты ешқандай айып тағылмаған. Қазына қаржысын тонағандарды осылай неге ұстай алмаймыз».
