Тірі болсам, қазаққа қызмет етпей қоймаймын!

Әлихан Бөкейхан

2000 есек: Жамбыл облысының тұрғындары есек баққан шаруашылықтан алаңдайды

17 маусым 2024 882
Қазақта "Есің кетсе, ешкі бақ" деген сөз бар еді. Бұл, сірә, ешкі жарықтықтың өсімталдығына байланысты айтылса керек. Ал енді "үйірлеп" есек баққандарға не дейміз? Бұл туралы Alash.kz ақпарат порталы Жамбыл облысында тұратын белгілі журналист Көсемәлі Сәттібайұлының жазбасына орай материал жариялайды. 
 
Автор "Баяғыда есі бар қазақ бір есектен артық ұстамайтын. Өйткені үйдің бар шаруасы бір есектен артылмайтын. Қазір ше? Қазір, тіпті, есекке қарап тұрған шаруа да жоқ. Сонда мына мыңғырған есекті не үшін бағып-қағып, ұстап отыр?" деп, Жамбыл облысының Байзақ ауданынан хабарласқан тұрғындардың сұраңын жариялапты.
Онда Байзақ тұрғындары: 
-Ауданымыздағы Шахан ауылында Айталы деген біреу 2000 қаралы есек бағып отыр. Олары ауылдағы жайылымдықты жайпап, ақтақырға айналдырып тастады. Иесімен сөйлесіп, мына "малыңды" алып кет дейін десек, келмейді. Байланысқа да шықпайды,-дейді.
Соңғы жылдары "есектің етін кейбір дәмханалар мен шұжық цехтарына, самса, шашлык жасайтындарға өткізетіндер пайда болыпты" деген әңгіме шыға бастады. Қытай еліне импорттайды дейтіндер де бар.
 
 
"Аудан тұрғындарының да алаңдап отырғандары осы сауалдарға жауап таба алмағандарынан. Егер есектердің иесі шаруасы заңды адам болса, онда ол неге тұрғындармен жолығып, бизнес- жоспарымен таныстырмайды? Мұншама есектерді не істемек? Күш көлік қыла ма, әлде "азық-түлік" қыла ма? Мән-жайын айтып, түсіндірмей ме халыққа?" дейді ардагер журналист.
 
Alash.kz ақпарат порталы бұл сауалды Жамбыл облыстық ауыл шаруашылығы басқармасына, облыстық санитарлық- эпидемиялық станциясына жолдай отырып, екі мыңдай есектің есебін алып, қожайынымен сөйлесіп,есек баққан шаруашылық иесінің мақсат-мүддесін анықтау қажет.
Елді алаңдатпайық! Өйткені, ертең есектің еті қазақтың қара қазанынан шығып жүрмесін? Бала бақша, мектеп асханалары мен кафелерді де тексеру қажет.
Аттары аталған мекеме басшыларынан жауап күтеміз! 
Бұл мақала туралы не ойлайсыз?