Атырау облысы Жылыой ауданына қарасты Құлсары қаласында су тасқынынан зардап шеккен ер адамның мәйіті табылды. Осыдан екі-үш күн бұрын жоғалған әкесі мен баласын құтқарушылар әлі іздестіріп жатыр. Бұл мәйітке олардың қатысы жоқ, деп хабарлайды Alash.kz.
Атырау облысы төтенше жағдайлар департаментінің хабарлауынша, бүгін (9 сәуір) сағат 12:27 шамасында дүкендердің бірінің жанынан ер адамның мәйіті табылды. Мәйіттің кімдікі екені әзірге белгісіз.
«Мәйіт полицияға тапсырылды», - деп хабарлады ТЖД.
6 сәуір күні "үйін қарап келуге кеткен" әкесі мен ұлы әлі табылмады. Бұл табылған мәйіттің оларға түк қатысы жоқ екені айтылды.
«Біз әлі іздеп жатырмыз, бірақ бүгінгі мәйіт жоғалған адамға да, оның ұлына да тиесілі емес», - деп түсіндірді төтенше жағдайлар департаменті.
