Азия ойындарында өнер көрсеткен спортшы Ясмина Тоқсанбаева бүгінгі марапаттау сәтінен кейін әлеуметтік желіде арнайы мәлімдеме жасады, деп хабарлайды Alash.kz.
Еске сала кетсек, спорттық жүруден Азия ойындарында бақ сынаған отандасымыз мәре сызығын жеңіспен аттағанымен, регламент талаптарына сай келмейтін аяқ киім таңдағаны үшін алтын медалінен айырылған болатын. Дегенмен, мемлекет спортшының ерен еңбегін бағалап, бүгін Мемлекет басшысы Қасым-Жомарт Тоқаев оған «Ерен еңбегі үшін» медалін табыстады. Осы қуанышты сәттен кейін спортшы желіде жүрекжарды лебізін жеткізді:
«Бүгінгі құрмет пен қолдау үшін шын жүректен алғыс айтамын! Марафонның соңғы шақырымдарында әр қадам үлкен төзімді талап етеді. Сондай сәтте артымда елім, тілеуімді тілеген халқым тұрғанын сезіну маған күш береді», — деді спортшы.
Сонымен қатар ол мемлекет тарапынан көрсетілген қолдаудың маңыздылығын атап өтіп, бапкерлері мен жанкүйерлеріне ризашылығын білдірді:
«Сіздің «Әділетті Қазақстан» бастамаңыз мен үшін ерекше мәнге ие. Жарыс мен күткендей аяқталмаса да, бүгін еңбегімнің ескеріліп, құрмет көрсетілгені маған үлкен демеу болды. Бапкерлеріме, отбасыма және барша жанкүйерге рақмет! Маған білдірілген сенім жауапкершілігімді арттырады», — деп ағынан жарылды ол.
Сөз соңында Ясмина Тоқсанбаева алдағы бәсекелерде ел намысын абыроймен қорғауға уәде берді:
«Алдағы жарыстарда ел намысын абыроймен қорғап, осы сенімді ақтауға барымды саламын!» — деп түйіндеді сөзін спортшы.
