Ресей Сыртқы істер министрлігінің ТМД елдері бойынша екінші департаментінің директоры Алексей Полищук Ұлыбритания мен Францияның Украинаға әскери контингент орналастыруға дайын екені жөніндегі жазбаша мәлімдемелеріне түсініктеме берді. Оның айтуынша, мұндай қадам аймақтағы жағдайды тұрақтандырмайды әрі бейбітшілік орнатуға ықпал етпейді, деп жазады Alash.KZ.
«Бұл – Лондон мен Париж бастамашы болып отырған, өзін “ниет білдірушілер коалициясы” деп атайтын көпұлтты күштер туралы сөз. Мұндай “күштер” қауіпсіздікке нақты кепілдік бере алмайды», – деді Полищук.
Ресей СІМ өкілінің пікірінше, Украина аумағында шетелдік әскердің пайда болуы қақтығыстың ушығуына, сондай-ақ өңірдегі қауіпсіздік қатерлерінің артуына әкелуі мүмкін. Ол мұндай бастамалар бейбіт реттеу процесіне қайшы келеді және жағдайды дипломатиялық жолмен шешуге кедергі келтіреді деп есептейді.
Сонымен қатар, Мәскеу бұл мәселеде Украинаның бейтарап мәртебесін сақтау және қауіпсіздікке қатысты шешімдер халықаралық құқық нормаларына сәйкес қабылдануы тиіс екенін бірнеше рет атап өткен. Ресей тарапының мәлімдеуінше, кез келген шетелдік әскери қатысу Ресейдің ұлттық қауіпсіздігіне тікелей қатер ретінде бағаланады.
Бұған дейін бірқатар Батыс елдері Украинаға қауіпсіздік кепілдіктерін беру мүмкіндігін талқылаған болатын. Алайда бұл ұсыныстардың нақты форматы мен құқықтық негізі әзірге белгісіз күйінде қалып отыр.
