Түркістан облысының Сайрам аудандық соты өз басынан өткен жағдайды жақындарынан жасырып, жаңа туған нәрестесінің өмірін қиған бойжеткенге қатысты үкім шығарды. Бұл туралы сот материалдарына сілтеме жасап Alash.KZ хабарлайды.
Ресми деректерге сүйенсек, кәмелеттік жасқа толған қыз бейтаныс азаматпен өз келісімі бойынша жақындасып, соның салдарынан жүкті болып қалған. Бойжеткен бұл жағдайды туыстарына айтудан қорыққандықтан, тоғыз ай бойы дәрігерлердің бақылауына алынбай, ешқандай медициналық мекемеге есепке тұрмаған.
Толғағы қысқан сәтте ол өзінің Сайрам ауданындағы тұрғылықты үйінде болған.
«Аула ішіндегі әжетханада мерзіміне жетіп піскен, тірі шақалақты дүниеге әкелген. Сәбиін босана салысымен, оны әжетхана шұңқырына лақтырып жіберген. Оның тірі қалуына ешқандай жағдай жасамаған. Нәрестенің денесі көрініп қалмауы үшін қора жақта тұрған күректі алып, ауладағы тас аралас топырақты сәбидің үстіне тастаған. Осы әрекеті арқылы ол өзінің жаңа туған шақалағын босану сәтінде саналы түрде өлтірген», — делінген соттың ресми мәлімдемесінде.
Сот талқылауы барысында айыпталушы орын алған қайғылы жағдайды және өзіне тағылған қылмыстық істі толығымен мойындап, өкініш білдірді.
Сот алқасының соңғы шешімімен кінәлі деп танылған бойжеткеннің бас бостандығы 2 жыл мерзімге шектеу жазасына кесілді.
