Батыс Қазақстан облысында Махамбет Өтемісұлы атындағы университеттің ректоры Нұрлан Серғалиев өз лауазымдық өкілеттігін асыра пайдаланды деген күдікпен ұсталды, деп хабарлайды Alash.kz.
Бұл туралы алғаш болып қоғам белсендісі әрі заңгер Бауыржан Заки жазды. Заңгердің айтуынша, аталған жоғары оқу орнының қызметкерлері оған университет басшысының құрықталғанын және дәл қазір оның жұмыс кабинетінде тиісті тінту шаралары жүргізіліп жатқанын жеткізген.
Қоғам белсендісі бұл жайтқа қатысты өзінің Facebook парақшасында: «Махамбет Өтемісұлы атындағы университетте қызмет атқаратын қызметкерлердің айтуынша, бүгін университет ректоры Нұрлан Серғалиев лауазымдық міндетін асыра пайдалану фактісі бойынша ұсталып, жұмыс орнында тінту жұмыстары жүргізілуде», - деп мәлімдеме жасады.
Сонымен қатар, тараған ақпаратқа сәйкес, ректорға қатысты қылмыстық қудалау ісін Ұлттық қауіпсіздік комитетінің Батыс Қазақстан облысы бойынша департаментінің Сыбайлас жемқорлыққа қарсы іс-қимыл қызметі қолға алған. Әзірге құқық қорғау органдары аталмыш оқиғаға байланысты ешқандай ресми түсініктеме бере қойған жоқ, сондай-ақ Нұрлан Серғалиевке нақты қандай айып тағылғаны және тергеудің өзге де егжей-тегжейлі мән-жайы жария етілмеді. Ресми органдардан қосымша ақпарат түскен жағдайда материал толықтырылады.
