Қырғызстан Парламенті Джалал-Абад қаласын Манас деп қайта атау туралы заң жобасын мақұлдады. Шешім бүгін Жогорку Кеңеш отырысында қабылданды, деп Alash.kz ұлттық порталы 24.kg басылымына сілтеме жасап хабарлайды.
Басылымның хабарлауынша, Жогорку Кеңеш депутаты Мирлан Самыйқожо Джалал-Абад тұрғындарын қаланың Манас болып өзгертілуімен құттықтап, бұл шешімнің маңызын атап өтті. Ол тұрғындардың жауапкершілігін де еске салды.
"Сонымен бірге джалал-абадтықтар жауапкершілікті сезінуі керек. Болашақта интернетте манастық жезөкшелер, манастық жемқорлар, манастық зорлықшылар туралы жаңалықтар шықпауы тиіс. Қала тұрғындары үлгілі болып, Манастың беделін одан әрі көтеруі қажет", – деп келтіреді басылым депутатының сөзін.
Заң жобасы ұлттық идеологияны нығайту және қалаға қырғыз халқының қорғаушысы, халық батыры әрі тарихи тұлға – ұлы Манастың есімін беру мақсатында әзірленген. Бұл бастама жергілікті тұрғындар тарапынан көтеріліп, қалалық кеңес пен Джалал-Абад облысындағы президенттің өкілі қолдаған.
Мақала авторларының айтуынша, қайта атауға жұмсалатын шығын шамамен 15 миллион сомды (шамамен 91 788 840 теңге) құрайды.
Сонымен қатар, Джалал-Абад қаласының халқы 186 мың 400-ден асады, ал өзгерістер енгізілген Бас жоспар 2023 жылы бекітілген.
Барлық шығындар жергілікті бюджет есебінен жабылады. Заңды қабылдау республикалық бюджеттен қосымша қаражатты қажет етпейді.
Инициатива авторларының сөзіне сүйенсек, қаланың атауын өзгерту ешқандай әлеуметтік, экономикалық, құқықтық, экологиялық немесе жемқорлық салдарларын тудырмайды.
