АҚШ президенті Дональд Трамп Ресей мен Украина арасындағы қақтығысты тоқтату қажеттігін мәлімдеп, тараптардың Абу-Дабидегі келіссөздеріне қатысты пікір білдірді, деп жазады Alash.kz.
Ақ үйде сөйлеген сөзінде ол: «Мен оның соғысты тоқтатқанын қалаймын!» - деп атап өтті.
Америка көшбасшысы Владимир Путиннің энергетикалық нысандарға соққы беруді тоқтата тұру туралы бір апталық үзілісті ұзартпағанына қынжылыс білдірді. Соған қарамастан, Трамп Кремль басшысының берген уәдесін орындағанын оң бағалап, әсіресе «шынымен өте қатты аязды» ауа райында шабуылсыз өткен бір аптаны «көп уақыт» деп сипаттады.
Қазіргі уақытта Украина аумағында әскери соққылар жалғасып жатыр. Украина тарапы таратқан мәліметке сәйкес, Запорожьеде Ресейдің ұшқышсыз ұшу аппараты жасаған шабуылдан 18 жастағы бозбала мен бір жасөспірім қыз қаза тапты. Бұдан бөлек, 11 адам түрлі жарақат алған, олардың ішінде балалар да бар. Сондай-ақ өткен түнде Киев қаласы тағы да атқылауға ұшырады.
Соғысты тоқтату мақсатындағы дипломатиялық талқылаулар АҚШ-тың араағайындық етуімен Абу-Дабиде жалғасуда. Бүгін Киев пен Мәскеудің ресми өкілдері Біріккен Араб Әмірліктерінің астанасында екі күндік келіссөздер жүргізу үшін қайта кездеседі. Келіссөздерге қатысушы топтардың дерегінше, кейбір мәселелер бойынша тараптардың ұстанымдары біршама жақындаған. Алайда аумақтық дау негізгі түйткіл болып қалып отыр. Ресей тарапы Украина қарулы күштерінің Донецк облысынан толық шығарылуын талап етсе, Киев бұл шарттың мүлдем қабылданбайтынын мәлімдеді.
