Шымкенттік шенеунік ұрланған ақшаға әйеліне электромобиль сатып алды, деп хабарлайды ALASH.kz
Сыбайлас жемқорлыққа қарсы іс-қимыл агенттігінің келтірген деректері бойынша Шымкент қаласының шенеунігі ұрланған қаражатқа жұбайына электромобиль сатып алған.
Агенттіктің мәліметінше, сыбайлас жемқорлыққа күдіктілер көбінесе мүлікті туыстарының, сенімді адамдардың және басқа тұлғалардың атына рәсімдейді.
“Әдетте, олар мүліктің және оны сатып алуға жұмсалған қаражаттың заңды шығу көзін дәлелдей алмайды, ал олардың ресми табысы активтердің құнынан әлдеқайда төмен”, – деп мәлімдеді Сыбайлас жемқорлыққа қарсы агенттіктің ресми өкілі Данияр Бигайдаров.
Өкілдің айтуынша, бұл – жемқорлар арасында жиі кездесетін жағдай. Мысалы: Шығыс Қазақстан облысында сыбайлас жемқорлыққа күдікті азамат заңсыз алынған қаражатқа сатып алған көлік пен екі пәтерді жұмыссыз туысының атына рәсімдеген;
• Шымкент қаласында шенеунік ұрланған ақшаға әйеліне электромобиль сатып алған;
• Жетісу облысында жүргізілген қаржылық тергеу нәтижесінде жалпы құны 2,8 миллиард теңгені құрайтын мүлік анықталып, тәркіленді. Бұл тізімге ақшалай қаражат, алты автокөлік және пәтер кіреді.
Мұндай жағдайлар сирек емес. Заңсыз жолмен алынған барлық активтерге тыйым салынып, олардың әрі қарай тәркіленуі сот үкімімен шешіледі.
