Владимир Зеленский Қырымға қатысты талаптардан бас тартуға дайын, деп есептейді АҚШ-тың президенті Дональд Трамп. Бұл туралы ALASH.KZ мәлімдейді.
— солай деп ойлаймын, — деді ол осыған қатысты қойылған сұраққа жауап бере отырып.
25 сәуірде жарияланған Time журналына берген сұхбатында Трамп Қырым «бейбіт келісім аясында Ресей құрамында қалады» деп мәлімдеді.
Бұған дейін бірнеше америкалық БАҚ келіссөздер барысында АҚШ Қырымды Ресейдің бір бөлігі ретінде мойындауы мүмкін екенін жазған.
Қырым 2014 жылғы референдум нәтижесінде Ресей құрамына қосылды. Ресей президенті Владимир Путин республиканың аумақтық мәртебесі мәселесін «жабық» деп атаған болатын.
Мәскеудің негізгі талаптарының бірі — Қырымды Ресейдің бөлігі ретінде халықаралық деңгейде мойындау.
Зеленский Украина Қырымды Ресей аумағы ретінде мойындамайтынын бірнеше рет айтқан. Ал Трамп Киевтен Қырымды ресми түрде мойындауды ешкім талап етпейтінін атап өтті.
Соған қарамастан, Зеленский Қырымды қайтарудың қиындығын мойындап, Трамптың бұл тұрғыдағы сөзінің белгілі бір дәрежеде шындық екенін айтқан. Ол мұны «адам жетіспеушілігімен емес, қару-жарақтың тапшылығымен» байланыстырған. АҚШ президенті Украина неге он бір жыл бойы Қырым үшін күреспегенін, ал Ресей бұл аумақты «бір оқ атпай» бақылауына алғанын түсінбейтінін жеткізген.
Бұл сырттай пікірталаста Зеленский Трамптың алғашқы президенттік мерзіміндегі әкімшіліктің ұстанымын еске салды.
Ол кезде Мемлекеттік хатшы Марк Помпео АҚШ-тың «Ресейдің Қырымды аннексиялау әрекетін қабылдамайтынын және Украинаның аумақтық тұтастығы қалпына келгенше осы саясатты ұстанатынын» мәлімдеген еді.
