Германия канцлері Фридрих Мерц Ресей президенті Владимир Путин мен Украина президенті Владимир Зеленскийдің тікелей келіссөздері Женевада өтуі мүмкін екенін айтты. Оның пікірінше, Женева – атысты тоқтату туралы келісімге қол қою үшін қолайлы орын. Бұл туралы ол Берлинде Швейцария президенті Карин Келлер-Зуттермен бірлескен баспасөз мәслихатында мәлімдеді, деп жазады Alash.kz.
Мерц бұл швейцариялық қаланы саммит өткізу алаңы ретінде 4 қыркүйекте Парижде өтетін Украина бойынша "ынталылар коалициясының" кездесуінде ұсынатынын нақтылады. Бұған дейін Франция президенті Эмманюэль Макрон да Путин мен Зеленский келіссөздерін Женевада өткізуді қолдаған болатын.
Өз кезегінде Келлер-Зуттер Швейцария билігі Зеленский мен Путиннің Женевадағы екіжақты кездесуін ұйымдастыруға дайын екенін айтты. Оның сөзінше, көптеген халықаралық ұйымның кеңселері орналасқан бұл қала бейбіт келіссөздер үшін "тамаша орын".
"Маңыздысы – бұл адамдар бір-бірімен сөйлесуі, аз да болса алға қадам жасауы және осы соғыстың тоқтауы. Бірақ, әрине, бәрі тараптардың келіссөздер үстеліне отыруға дайын болуына байланысты болады", – деп атап өтті Швейцария президенті.
