Абай облысында із-түзсіз жоғалып кеткен 44 жастағы ер адамның денесі бір аптадан кейін даладан өлі күйінде табылды, деп хабарлайды Alash.kz.
Марқұм 4 қараша күні үйінен шығып кетіп, қайта оралмаған. Хабар түскен бойда оны іздеуге полиция қызметкерлерінен бөлек, еріктілер мен жергілікті ауыл тұрғындары — жалпы саны 100-ден астам адам жұмылдырылды.
Іздестіру жұмыстары барысында бес күннен кейін марқұм тізгіндеген Lexus 570 маркалы автокөлік сайдан табылған болатын. Ал жетінші күні іздеу тобы ер адамның мәйітін Ново-Васильевка ауылынан шамамен 35 шақырым қашықтықтағы айдаладан анықтады.
Тәртіп сақшыларының мәліметінше, марқұмның денесінен зорлық-зомбылық белгілері табылмаған. Осыған байланысты алдын ала болжам бойынша, азамат далада үсіп қайтыс болуы мүмкін. Қазіргі уақытта өлімнің нақты себеп-салдарын анықтау үшін тиісті сот-медициналық сараптама тағайындалып, тергеу амалдары жүргізілуде.
