АҚШ президенті Дональд Трамп халыққа үндеу жасады, деп хабарлайды ALASH.KZ.
Трамптың айтуынша, Қытай 2020 жылдан бері АҚШ-тағы сайлау туралы деректерге қол жеткізу мақсатында операция жүргізіп, 220 миллион америкалық сайлаушының ақпаратына қол жеткізген.
Ол сайлау инфрақұрылымының осал тұстарын көрсететін маңызды барлау материалдарының құпиясыздандырылатынын мәлімдеді. Президенттің сөзінше, АҚШ-тың сайлау жүйесіне төнетін негізгі қауіптер қатарында Ресей, Қытай, Иран, Солтүстік Корея және мемлекеттік емес топтар бар.
Дональд Трамп:
«Мен дауыс беру инфрақұрылымының алаңдатарлық осалдықтары туралы мәліметтер қамтылған аса маңызды барлау материалдарын дереу құпиясыздандыру туралы шешім қабылдадым. Бұл деректер біздің сайлау жүйеміздің бұрын-соңды болмаған деңгейде хакерлік шабуылдарға, теріс пайдалануға және шетелдік араласуға осал екенін көрсетеді», – деді.
Сонымен қатар Трамп Ұлттық барлау қызметіне, Әділет министрлігіне, Федералдық тергеу бюросына (ФБР) және Орталық барлау басқармасына (ЦРУ) маңызды ақпараттың қалай және не себепті жария болғанын жан-жақты тергеуді тапсырды.
