Қырғызстанның экс-президенті Алмазбек Атамбаев барлық мемлекеттік марапаттарынан айырылды. Тиісті жарлыққа Қырғызстан президенті Садыр Жапаров қол қойды, деп жазады Alash.kz ұлттық порталы.
Ресми құжатта бұл шешім 2025 жылғы 3 маусымда Бішкектің Бірінші Май аудандық соты шығарған үкімді орындау мақсатында қабылданғаны көрсетілген. Сондай-ақ Қырғыз Республикасының "Мемлекеттік наградалар, құрметті атақтар және мемлекеттік сыйлықтар туралы" заңының 27-бабының 1, 2 және 4-бөліктеріне, сондай-ақ ел Конституциясының 71-бабына сүйенілген.
Жарлыққа сәйкес, Алмазбек Атамбаев келесі мемлекеттік марапаттарынан айырылды:
- Қырғыз Республикасының ең жоғары айрықша дәрежесі – "Кыргыз Республикасынын Баатыры" атағы;
- "Манас" орденінің II дәрежесі;
- "Данакер" ордені;
- "Данк" медалі.
Сонымен қатар осы марапаттарды беру туралы бұрын қабылданған президенттік жарлықтардың күші жойылды. Атап айтқанда, 1999, 2007, 2011 және 2017 жылдары қабылданған бірқатар жарлықтар ресми түрде кері қайтарылды.
