Оралдық өрт сөндіруші Қуаныш Тілешов 12 желтоқсандағы тұрғын үйдегі жарылыстан таңғажайып жағдайда аман қалды, деп хабарлайды Alash.kz.
12 желтоқсанда Оралдағы Циолковский көшесіндегі көпқабатты тұрғын үйде өрт шыққан кезде, ТЖ қызметкерлері дереу оқиға орнына жеткен. Өрттің қарқыны өте жоғары болып, кіреберіс толығымен түтінге оранған еді.
Қиын жағдайға қарамастан, құтқарушылар пәтерге балкон арқылы кіруді шешті. Алғашқы топта болған өрт сөндіруші Қуаныш Тілешов ішке кіруге дайындалып тұрған сәтте қуатты жарылыс орын алды. Соққы толқыны балкон мен терезелерді қиратып, жағдайды тіпті күрделендірді.
Қуаныш Тілешовтің айтуынша, барлығы бірнеше секунд ішінде болған. Тірі қалуының себебі – ол дер кезінде жерге жата алған.
«Маған жұбайым, туыстарым, әріптестерім, басшылық және тіпті бейтаныс адамдар хабарласып, халімді сұрады. Сол сәтте өз жұмысымның қаншалықты маңызды екенін терең сезіндім», — дейді Қуаныш.
Қуаныш 30 жаста, өрт сөндіру саласында 10 жыл қызмет етіп келеді. Үйінде оны жұбайы мен төрт баласы күткен. 
