Қазақстан Халық партиясы Құрылтай сайлауына қатысатын 72 кандидаттың ресми тізімін жариялап, оның қатарына танымал өнер жұлдыздарын қосты, деп хабарлайды Alash.kz.
Бұл тізімге партия төрағасы Нұрсұлтан Шоқанов, депутат Ирина Смирнова, белгілі әнші Тамара Асар және танымал тележүргізуші Аша Матай сынды тұлғалар енген. Осы орайда, саяси ұйымның ең танымал әрі белсенді өкілдерінің бірі, бұған дейін үш шақырылым бойы Мәжіліс депутаты болған Магеррам Магеррамовтың бұл жолы кандидаттар тізімінен тыс қалғаны белгілі болды. Сондай-ақ, өткен съез аясында журналистер тележүргізуші Аша Матайға қазіргі уақытта талқыланып жатқан заң жобаларының ең құрығанда біреуін оқып-танысқаны туралы сауал қойған еді. Алайда, партия атынан сайлауға түсетін өнер иесі бұл сұраққа нақты жауап бере алмай, ойланып тұрған сәтінде сахнаға шақырылып, артынша бірден кетіп қалды.
