Қазақстанда азық-түлік пен тұрмыстық тауарлардың қымбаттауы жалғасып жатыр. Ұлттық банктің жаңа есебіне сәйкес, 2024 жылдың қазан айында жылдық инфляция 12,6% болды. Бұл көрсеткіш қыркүйектегі 12,9%-дан төмендегенімен, бірнеше өңірде баға керісінше өсіп кеткен, деп хабарлайды Alash.kz.
Ресми мәліметке сүйенсек, инфляция 10 өңірде баяулаған, ал 6 өңірде жеделдеген, тағы 4 аймақта өзгеріссіз қалған.
Ең үлкен өсім азық-түлік бағасында байқалады. Қазанда олардың жылдық қымбаттауы 13,5%-ға жетті.
Ұлытау облысы көш бастап тұр. Мұнда азық-түлік құны 16,7%-ға көтерілген.
Ал, ең төменгі көрсеткіш Алматы қаласында тіркелді – 10,4%.
Азық-түлік емес тауарлар да арзандаған жоқ: олардың бағасы жылдық есепте 11,0%-ға өскен (қыркүйекте – 10,8%).
Экономистер жылдың соңына дейін инфляцияның бірқалыпты деңгейде сақталуы мүмкін екенін айтады, алайда өңірлер арасындағы айырмашылықтар баға саясатының әлі де тұрақсыз екенін көрсетеді.
