«Қазақмыс корпорациясы» ЖШС Басқарма төрағасының тау-кен ісі және байыту жөніндегі орынбасары Саят Бакиров компанияның 2060 жылға дейінгі тау-кен байыту кешенін дамыту стратегиясын талқылау үшін Тау-кен өндірісі (ТКӨ) бас директорларының қатысуымен кеңейтілген кеңес өткізді, деп хабарлайды Alash.kz.
«Қазақмыс» корпорациясында алдағы онжылдықтарға арналған тау-кен жұмыстарының стратегиялық кестесі пысықталды. Өндірістік бөлімшелердің қатысуымен өткен жиында кен өндіру көлемін арттыру және инфрақұрылымды заманауи талаптарға сай жаңғырту мәселелері қаралды. Қабылданған жоспар негізінде тау-кен техникаларын жаңарту мен жаңа өндіріс орындарын салуға бағытталған ауқымды инвестициялық бағдарлама жүзеге асырылмақ.
Компанияның басым міндеттерінің бірі — шикізат базасын нығайту. Осы мақсатта Жезқазған кен орнында геологиялық барлау жұмыстары қарқынды жүргізіліп, «Жыланды» кенішіндегі құрылыс пен жабдықтау шаралары жалғасады. Сонымен қатар, Қарағайлы байыту фабрикасының үздіксіз жұмысын қамтамасыз ету үшін «Құсмұрын» кен орны қосымша пайдалануға берілмек. Бұл қадамдар өндіріс қуатын тұрақты деңгейде ұстап тұруға мүмкіндік береді.
Нұрқазған байыту фабрикасын технологиялық тұрғыдан жетілдіруге баса назар аударылып отыр. Стратегиялық меже бойынша, кәсіпорын 2029 жылға қарай өнім өңдеу көлемін қазіргі 4 миллион тоннадан 4,5 миллион тоннаға дейін арттыруы тиіс. Бұл өңірдегі өндірістік әлеуеттің жаңа белеске көтерілуін білдіреді.
Даму стратегиясы қазіргі барланған кен қорларына негізделгенімен, оны іске асыру барысында нақтылау жұмыстары қатар жүреді. Шикізат құрамы мен көлеміне қатысты жаңа деректердің анықталуына байланысты бағдарламаға тұрақты түрде өзгерістер мен түзетулер енгізіліп отырмақ. Мұндай икемді тәсіл компанияның ұзақ мерзімді жоспарларының тиімділігін арттыруды көздейді.
