Медицина ғылымдарының докторы, Ұлттық ғылым академиясының академигі Раиса Күзденбаеваның қайтыс болды, деп жазады Alash.kz.
Ол еліміздегі фармакология саласының негізін қалаушылардың бірі және отандық фармацевтика ғылымын халықаралық деңгейге көтерген көрнекті тұлға ретінде белгілі. Профессордың ғылыми мұрасы мен қалыптастырған мектебі Қазақстанның денсаулық сақтау жүйесінде ерекше орын алады.
Ғалымның кәсіби ізденістері клиникалық және эксперименталдық фармакология бағыттарын толық қамтыды. Ол еліміздегі дәрігерлер мен ғылыми зерттеушілердің бірнеше буынын тәрбиелеп шығарып, жоғары білікті кадрлар даярлау ісіне жетекшілік етті. Күзденбаеваның тікелей қатысуымен отандық фармацевтика саласының іргетасы қаланып, ғылыми негізделген өндіріс жолға қойылды.
Раиса Күзденбаева жаңа дәрілік препараттарды жасау және оларды тәжірибеге енгізу процесіне белсенді атсалысты. Әсіресе, Қазақстанның табиғи шикізаттары негізінде жасалған дәрі-дәрмектерді клиникалық қолданысқа бағыттау бойынша іргелі зерттеулер жүргізді. Бұдан бөлек, ол еліміздегі фармакологиялық сараптама жүйесін қалыптастырып, ғылыми мектептердің жүйелі жұмысын ұйымдастырды.
Профессордың ғылым жолындағы жетістіктері мен отандық медицинаға қосқан үлесі жоғары мемлекеттік марапаттармен атап өтілген. Оның есімі қазақстандық фармакология тарихындағы алғашқы әйел-ғалым әрі білікті ұйымдастырушы ретінде сақталады. Әріптестері мен шәкірттері академиктің кәсіби шеберлігі мен ғылымға деген адалдығын ерекше бағалайды.
