Қазақ телевизиясының ардагері, танымал журналист Тілеуқабыл Мыңжасар өмірден өтті, деп хабарлайды Alash.kz.
Отандық журналистикада өзіндік қолтаңбасын қалдырған «Хабар аға» атанған ардагер тілші дүниеден озды. Қаралы хабарды «Хабар» агенттігі растады.
Тілеуқабыл Мыңжасар 1952 жылы Түркістан қаласында дүниеге келген. 1975 жылы әл-Фараби атындағы ҚазҰУ-дың журналистика факультетін бітіріп, еңбек жолын Қазақ телевизиясында бастаған. Кейін «Хабар» агенттігі құрылған сәттен бастап еңбек етіп, ұзақ жылдар бойы Алматы облысындағы меншікті тілшісі қызметін абыроймен атқарды.
Қырық жылдан астам ғұмырын отандық медиа саласына арнаған тележурналист елді мекендерді аралап, қарапайым халықтың тұрмысы мен өңірлердегі әлеуметтік мәселелерді республикалық эфирде үздіксіз көтерді. Әріптестері оны тікелей репортаждың нағыз шебері ретінде бағалайды.
Атқарған адал еңбегі үшін ол Қазақстан Журналистер одағы сыйлығының лауреаты, Алматы облысының құрметті азаматы, «Алтын микрофон» иегері атанып, Президенттің Алғыс хатымен және «Еңбекте үздік шыққаны үшін» медалімен марапатталған.
Марқұмның жаназа намазы 29 тамыз күні сағат 10:00-де Алматы қаласындағы қаралы шаңырағында (Розыбакиев көшесі, 289-үй, 80-пәтер) оқылады.
