Қазақстан Жазушылар одағының мүшесі, танымал ақын, аудармашы әрі мәдениет қайраткері Нұртас Исабаев 72 жасқа қараған шағында өмірден озды, деп хабарлайды Alash.kz.
Суыт хабарды Қазақстан Жазушылар одағының баспасөз қызметі ресми түрде жеткізген. Марқұм Нұртас Ибрагимұлы Исабаев 1954 жылдың 13 қарашасында Қызылорда облысының Жаңақорған ауданында өмірге келген. Ол өзінің шығармашылық жолында Қазақстан Жазушылар одағы сыйлығының және Ораз Жандосов қоры сыйлығының лауреаты атанып, Қазақстан Республикасы Мәдениет және ақпарат министрлігінің «Мәдениет қайраткері» төсбелгісімен марапатталған, сондай-ақ Қазақстан Республикасы Президентінің Мемлекеттік стипендиясы мен «Құрмет» орденінің иегері болған. Орта мектепті тәмамдаған соң алғашқы еңбек жолын аудандық газеттің корректоры ретінде бастаған ол, кейіннен 1982 жылы Мәскеу қаласындағы М.Горький атындағы Әдебиет институтын бітіріп шығады. Қаламгердің «Бастау» атты тұңғыш жыр жинағы 1980 жылы басылып шықса, кейінгі жылдары «Өмірді сүю» (1987), «Ұлылықпен сырласу» (1990), «Қимаймын сені» (1998) және «Өмірге құштарлық» секілді өзге де поэзиялық туындылары оқырманға жол тартты. Ақынның туындылары орыс тілінде жарық көрген «Разбег» атты ұжымдық жинаққа енген, бұған қоса ол орыстың әйгілі ақыны Александр Твардовскийдің шығармаларын қазақ тіліне тәржімалап, отандық аударма өнерінің өркендеуіне өзіндік үлесін қосты.
Ақынның қазасына байланысты зиялы қауым өкілдері ресми мәлімдеме жасап, қазақ әдебиетіне орны толмас қаза келгенін атап өтті.
Қазақстан Жазушылар одағының Басқармасы таратқан ресми мәлімдемеде былай деп жазылған:
«Қазақстан Жазушылар одағының Басқармасы марқұмның жақындары мен туыстарына, барша оқырман қауымға қайғырып көңіл айтады!»
