Қадір түні оқылатын дұғалар және ғибадаттар
Қадір түні – мың айдан да қайырлы қасиетті түн. Бұл түнде жасалған ғибадат, оқылған дұға мен Құран мың ай бойы жасалған құлшылықтан артық саналады. Сондықтан әрбір мұсылман бұл мүмкіндікті жібермей, Алладан кешірім сұрап, дұға еткен жөн.
1. Пайғамбарымыз (с.ғ.с.) үйреткен Қадір түні оқылатын дұға
Айша анамыз (р.а.) Пайғамбарымыздан (с.ғ.с.):
“Уа, Алланың елшісі! Егер мен Қадір түнін дәл тапсам, қандай дұға оқиын?” – деп сұрағанда, Алла елшісі (с.ғ.с.):
اللهم إنك عفو تحب العفو فاعف عني
“Аллаһумма иннәкә афууун, тухиббул-афуа, фа’фу анни.”
Мағынасы:
“Уа, Алла! Шексіз кешірімдісің, кешіруді жақсы көресің, мені де кешіре гөр!”
Бұл дұғаны көп мәрте қайталап, кешірім сұрау – ең абзал амалдардың бірі.
2. Қадір түні оқылатын басқа да дұғалар
Күнәлардың кешірілуі үшін:
اللهم اغفر لي ذنوبي كلها، دقها وجلها، وأولها وآخرها، وعلانيتها وسرها
“Аллаһуммағфир ли зунуби күлләһа, діққаһа уә җилләһә, уә әууәләһә уә әхирәһә, уә а’ләниәтәһә уә сірраһа.”
Мағынасы:
“Уа, Алла! Менің барлық күнәларымды кешір! Үлкенін де, кішісін де, әуелгісін де, соңғысын да, жариясын да, жасырын болғанын да!”
Ризық-несібенің молаюы үшін:
اللهم ارزقني رزقا حلالا طيبا مباركا فيه
“Аллаһумма-рзуқни ризқан халалан таибан мубаракан фиһи.”
Мағынасы:
“Уа, Алла! Маған адал, таза әрі берекелі ризық нәсіп ете гөр!”
Денсаулық пен амандық сұрау:
اللهم اشفني واشف مرضى المسلمين
“Аллаһумма-шфини уә-шфи мардал-муслимин.”
Мағынасы:
“Уа, Алла! Маған және барлық мұсылман ауруларға шипа бере гөр!”
Жүрекке тыныштық пен иман нұрын сұрау:
اللهم اشرح لي صدري ويسر لي أمري
“Аллаһуммәшрах ли садри уә йассир ли әмри.”
Мағынасы:
“Уа, Алла! Жүрегіме кеңшілік бер, ісімді оңайлат!”
3. Қадір түнінде қандай амалдар жасау керек?
1. Тахажуд намазын оқу– түнгі намаздың ең қадірлісі осы түні орындалады. Кемінде екі рәкағат болса да оқу ұсынылады.
2. Құран оқу– қасиетті Құран осы түні түсірілгендіктен, оны оқып, мағынасын түсінуге тырысу сауапты іс.
3. Тәубе ету және истиғфар айту– күнәлардың кешірілуі үшін Алладан кешірім сұрау.
4. Пайғамбарымызға (с.ғ.с.) салауат айту– бұл түнде көп салауат айту өте сауапты.
5. Садақа беру– мұқтаждарға көмектесу арқылы үлкен сауапқа кенелуге болады.
6. Дұға ету– шын жүректен дұға жасап, Алладан сұрау.
Қадір түнін ұйқысыз өткізіп, Алланың разылығына бөленуге тырысу – әрбір мұсылманның мақсаты. Бұл түнде жасалған шынайы құлшылықтың сауабы өлшеусіз. Алла баршамыздың дұғаларымызды қабыл етсін!
