Белгілі әнші, сазгер Ұшқын Жамалбек «Мұзбалақ» әнін Мұхтар Шахановтың рухына арнап орындады, деп жазады Alash.kz.
«Qazaqstan» телеарнасындағы «1001 түн» бағдарламасының қонағы болған Ұшқын Жамалбек өзінің танымал «Мұзбалақ» туындысын қазақтың біртуар ақыны Мұхтар Шахановқа арнады. Өнер иесі бұл шешімін шығарманың мазмұны мен ақын тұлғасының арасындағы рухани сабақтастықпен байланыстырды. Бүгінде аталған ән қоғамдағы маңызды оқиғалар мен жетістіктерді сипаттайтын бейнематериалдардың негізгі сүйемелдеуіне айналған.
Әншінің пайымдауынша, бұл туындының негізгі идеясы биіктік пен қайсарлықты дәріптеуге негізделген. Студиядағы әңгіме барысында ол шығарманың мағыналық жүгіне тоқталып, оның жеңісті сәттерде жиі шырқалатынын атап өтті. Өзінің ақынға деген құрметін Ұшқын Жамалбек былайша жеткізді:
«Мен үшін бұл ән қуанышты, жеңісті сәттерде қолданылғаны үлкен қуаныш. Ал бүгін осы өлеңді Мұхтар Шахановқа арнадым. Бәріміздің қабырғамызды қайыстырды. Себебі әннің атауы биік пен ең мықтыны білдіреді». Оның айтуынша, «Мұзбалақ» атауының өзі ақынның болмысына сай келетін рухты бейнелейді.
