Ресей президенті Владимир Путин “Валдай” клубының пленарлық отырысында Таяу Шығыстағы жағдайға қатысты мәлімдеме жасады, деп жазады Alash.KZ.
Путин пікірінше, Газадағы қақтығыстың түпкілікті шешімі тек Палестина мемлекеті құрылған жағдайда ғана мүмкін. Мәскеу бейбіт бастамаларды қолдауға әрқашан дайын екенін жеткізді.
Путин сөзінде Палестина халқының өз мемлекетін құру құқығы халықаралық құқық тұрғысынан да, әділет тұрғысынан да орынды екенін атап өтті.
“Егер бұл мәселе шешілмесе, қақтығыс тоқтамайды” деді ол.
Ресейдің бұл ұстанымы ұзақ жылдар бойы ұстанып келе жатқан сыртқы саясатпен үндеседі. Бұған дейін Ресей Сыртқы істер министрлігі Палестина мәселесін “Біріккен Ұлттар Ұйымының қарарларына сәйкес әділ шешу қажет” деп бірнеше рет мәлімдеген болатын.
Сондай-ақ, Путин Дональд Трамптың жоспарына қатысты пікір білдіріп, бірқатар ұсыныстарды қарастыруға болатынын айтты. Жоспарға сәйкес, біраз уақытқа Газа секторының билігін уақытша “Бейбітшілік кеңесі” атты орган өз қолына алуы мүмкін. Ақпарат көздері бұл кеңестің құрамына АҚШ президенті мен Ұлыбританияның бұрынғы премьер-министрі Тони Блэр кіретінін хабарлады.
Қазіргі таңда Таяу Шығыстағы шиеленіс – халықаралық саясаттағы ең күрделі мәселелердің бірі. Ресейдің Палестина мемлекетін қолдауы – әлемдік державалар арасындағы саяси позицияның айқын көрінісі. Ал алдағы уақытта бұл бастаманың қалай жүзеге асатыны жаһандық дипломатияның басты тақырыбы болмақ.
