Петропавл қаласындағы мектептердің бірінде оқушыдан тапанша табылғаны туралы тың ақпарат мәлім болды, деп жазады Alash.kz.
Солтүстік Қазақстан облысының білім басқармасы бұл мәліметке қатысты түсініктеме беріп, сөз болып отырған заттың тек сыртқы түрі ғана қаруға ұқсайтынын нақтылады. Қазіргі уақытта аталған дерек бойынша сотқа дейінгі тергеу амалдары жүргізіліп жатыр.
СҚО білім басқармасы «Курсив» басылымының ресми сауалына берген жауабында оқиғаның Петропавл мектептерінің бірінде орын алғанын растады. Білім басқармасының хабарлауынша, тиісті дабыл хабарламасы оқушылардың ата-аналары тарапынан түскен.
«Ағымдағы жылдың 5 ақпанында мектеп әкімшілігіне ата-аналардан жоғары сынып оқушысында тапаншаға ұқсас зат болуы мүмкін екендігі туралы ақпарат келіп түсті», – деп хабарлады білім басқармасы.
Алынған мәліметтен кейін білім мекемесінің әкімшілігі жедел шаралар қабылдап, қауіпсіздік режимін күшейткен.
Мектеп басшылығының іс-қимылы туралы ведомство мынадай мәлімет қосты: «Ұйым басшылығы дереу әрекет ету шараларын қабылдады. Оқушы мамандандырылған күзет қызметкерлерінің қатысуымен мектеп әкімшілігіне шақырылып, оның заңды өкілдері мен ювеналды полиция инспекторына жедел түрде хабарланды».
Оқиға орнына келген полиция қызметкерлері ақпаратты тексеріп, күдікті затты тәркілеу және мән-жайды анықтау жұмыстарын бастады. Ресми мәліметте құқық қорғау органдарының тексеру барысында аталған затты тәркілегені және осы факті бойынша сотқа дейінгі тергеу жүргізіліп жатқаны айтылған. Оқиғаның барлық жағдайларын құзырлы органдар анықтауда.
