Маңғыстау облысында қаза тапқан және қайғылы оқиғадан аман қалған әскери қызметшілерге арналған «Ұлттық рух» қорындағы қаражатты бөлу жұмыстары аяқталды, деп жазды Alash.kz.
Бұл туралы облыстық Қоғамдық кеңестің төрағасы Бекмурат Жүсіпов мәлімдеді. Оның айтуынша, жиналған қаражат қаза тапқан сарбаздардың отбасыларына тең бөлінген. Сондай-ақ аман қалған әскери қызметшілерге жеке материалдық көмек қарастырылған.
Қаражатты бөлу туралы шешімдерді арнайы комиссия қабылдаған. Оның жұмысына қаза тапқан сарбаздардың ата-аналары да қатысқан. Барлық шешім тиісті құжаттармен рәсімделген.
Төлемдердің нақты сомасы мен қаражат алушылардың жеке деректері жарияланбайды. Бұл — әскери қызметшілердің туған-туыстарының өтініші және олардың қауіпсіздігі мен жеке мәліметтерінің құпиялығын сақтау мақсатында қабылданған шешім.
