Франция президенті Эммануэль Макрон БҰҰ-ның 80-ші Бас Ассамблеясы аясында Палестинаны ресми түрде мемлекет ретінде мойындау туралы бастама көтермек, Аlash.kz.
Оның бұл қадамы АҚШ пен Израильдің ықпалына қарсы саяси қарсылық білдіруге бағытталған. Макронның бастамасын бірқатар мемлекеттер қолдап отыр. Атап айтқанда, Ұлыбритания, Бельгия, Португалия, Люксембург, Мальта, Австралия және Канада Франциямен бірге әрекет етуге дайын екендерін білдірген. Бұл елдердің қолдауы бастаманың халықаралық деңгейде айтарлықтай назарға алынғанын көрсетеді.
Дегенмен, барлық Еуропа елдері бір пікірде емес. Германия, Италия және Нидерланд сынды мемлекеттер Макронға қосылмайтынын мәлімдеді. Мұндай келіспеушілік Еуропаның ішкі саяси алаңында ортақ ұстанымға келудің қаншалықты күрделі екенін аңғартады.
Палестинаны мойындау қақтығыстың қазіргі барысына айтарлықтай әсер етпеуі мүмкін. Алайда бұл қадам Еуропаның болашақта Таяу Шығыс мәселесіне қатысты нақты позиция қалыптастыруына ықпал ететін маңызды саяси белгі болмақ.
