Лазер мен дрон арқылы ұшқышқа кедергі келтіргендерге жаза қатаңдайды

Лазер немесе дрон арқылы ұшақтың жұмысына кедергі келтіргендер 10 жылға дейін бас бостандығынан айырылады, деп жазады Alash.KZ.
 
Бас прокуратураның хабарлауынша, мұндай әрекеттер ұшу қауіпсіздігіне тікелей қауіп төндіреді. Себебі ұшқыштар уақытша көру қабілетінен айырылып, бұл өз кезегінде ұшақ апатына әкелуі мүмкін.

Қазақстанның авиациялық қызметтерінің мәліметінше, соңғы 6 жыл ішінде жолаушылар лайнерлерімен байланысты осындай 98 оқиға тіркелген. Ең көп фактілер Алматы халықаралық әуежайында орын алды. Егер 2017 жылы 8 хабарлама тіркелсе, 2023 жылы – 30.

Соңғы уақытқа дейін отандық заңнамада мұндай әрекеттер үшін арнайы жауапкершілік қарастырылмаған, бұл кінәлілерді жауапқа тартуды айтарлықтай қиындатты.

16 шілдедегі заңның қабылдануымен Қылмыстық кодекске лазерлік құрылғыларды немесе ұшқышсыз ұшу аппараттарын пайдалана отырып, әуе кемесін басқаруға кедергі келтіргені үшін қылмыстық жауаптылықты белгілейтін жаңа 352-1-бап енгізілді.

Жаза жасалған әрекеттің салдарына байланысты айыппұл немесе қамауға алудан 10 жылға дейін бас бостандығынан айыруға дейін өзгереді.