АҚШ президенті Дональд Трамп Иранды ядролық келісімге келуге шақырып, егер Тегеран АҚШ-пен мәміле жасамаса, оның салдары «олар күткеннің бәрінен де ауыр болатынын» ескертті, деп хабарлайды ALASH.KZ.
Бұл туралы Трамп Truth Social әлеуметтік желісінде жазды:
«Мен Иранға келісім жасау үшін көп мүмкіндік бердім. Ең сенімді сөздермен: “Жай ғана жасаңыздар” деп айттым. Бірақ олар қанша тырысқанымен, қаншалық жақындағанымен, бәрібір жасай алмады. Мен оларға мұның салдары олар білетін, күткен немесе естігеннің бәрінен де ауыр болатынын айттым», – деп жазды Трамп.
Оның айтуынша, АҚШ «әлемдегі ең озық және ең қауіпті қаруды» өндіреді, әрі «Израильде ондай қарудың саны көп, әрі арта түседі – және олар оны қалай пайдалану керектігін жақсы біледі».
«Кейбір ирандық жоғары лауазымды тұлғалар батыл сөйледі, бірақ не болайын деп тұрғанын білмеді. Қазір олар өлді, әрі бұдан да жаман болады! Қазірдің өзінде көптеген адам қаза тауып, қиратулар болды. Бірақ бұл қырғынды тоқтатуға әлі де уақыт бар. Себебі келесі шабуылдар бұдан да қатыгез болады. Иран мәмілеге келуі керек – әйтпесе ештеңе қалмайды. Кезінде Иран империясы атанған елден түк қалмайды. Өлім де, қирату да болмасын. Жай ғана келісімге келіңіздер. Әлі кеш емес!» – деп түйіндеді АҚШ президенті.
