Атырау облысында су тасқыны қаупі бар учаскелерде тәулік бойы кезекшілік жүргізіледі, деп хабарлайды alash.kz сайты Halyq Uni сілтеп.
Атырау облысы әкімінің баспасөз хатшысы Руслан Жұмағазиев ОКҚ брифингінде атап өткендей, Индер ауданында Жайық өзені шектік деңгейден 11 см-ден асып түсті.
«Жайық өзенінің жағасында орналасқан ауылдарда тәулік бойы кезекшілік пунктері ұйымдастырылды», - деді спикер.
Махамбет ауданында Жайық өзені шектік деңгейге жақындап келеді: бүгінгі таңда су деңгейі - 848 см, шегі-850 см, жалпы ұзындығы 65 шақырым, орташа биіктігі-2,5-3 м. Бөгеттерді көтеру және нығайту бойынша жұмыстар жүріп жатыр.
Жарсуат және Құрылыс ауылдарында қорғаныс бөгеттерінің бойында тәулік бойы кезекшілік пунктері орнатылды, - деп толықтырды Жұмағазиев.
Атырау қаласында Жайық өзенінің деңгейі - 490 см, шектік деңгейі – 550 см, 4 - мамырға жоспарланған 250,7 шақырым бөгеттің 249 шақырымы салынды. Ал Жылыой ауданының Құлсары қаласында соңғы тәулікте 78 үйден су сорылды, бүгінде 27 үй су астында қалып тұр. Сорылған судың жалпы көлемі 4 млн текше метрден асады. 1 860 нысанға дезинфекциялық жұмыстар жүргізілді. Сондай-ақ қаланы санитарлық тазарту жалғасып, соңғы тәулікте 500 тонна қоқыс шығарылды.
«Соңғы тәулікте 16 тұрғын үй мен 3 коммерциялық нысан электр қуатына қосылды. 4 мамырға дейін азаматтардан залалды бағалау және өтеу жөніндегі комиссия 2 818 өтініш қабылдады. Зардап шеккен 3 657 адамға 100 АЕК мөлшерінде біржолғы материалдық көмек көрсетілді», - деп нақтылады өңір өкілі.
Бұған дейін Жайық өзеніндегі су деңгейі артып келетінін хабарлаған болатынбыз. Тасқыннан кейін 13 мыңнан астам отбасы мемлекеттік қолдауға ие болған еді.
