Депутат Асхат Аймағамбетов жаңа азаматтық-құқықтық келісім ережелерін түсіндірді деп хабарлайды Alash.kz Syrmedia.kz арнасына сілтеме жасап.
Оның айтуынша, жаңа түзетулер нақты қызметкер болып жұмыс істеп жүрген адамдарды азаматтық-құқықтық келісім арқылы рәсімдеуге тыйым салады.
«Қазіргі таңда көптеген компаниялар әлеуметтік төлемдерден қашу, еңбек демалысын бермеу және жұмыскерді оңай жұмыстан шығару үшін азаматтық-құқықтық келісімді пайдаланып отыр. Егер, адам мен компания арасында еңбек қатынасының кем дегенде бір белгісі болса, мысалы, жұмыс уақытын сақтау немесе кеңседе жұмыс істеу сияқты. Онда, азаматтық-құқықтық келісім жасауға тыйым салынады. Мұндай жағдайда тек еңбек шарты болуы керек», – деді Аймағамбетов.
Ол заңды азаматтық-құқықтық келісімге мысал да келтірді:
“Егер, суретші мектепке қабырға панносын жасап берсе, жұмыс уақытын өзі белгілесе, материалды өзі таңдаса, нәтижеге қарай ақы алса және директорға бағынбаса – бұл әділ, дұрыс азаматтық-құқықтық келісім. Ал егер хатшы 9:00–18:00 аралығында жұмыс істеп, басшының тапсырмаларын орындаса, жалақы алса, бірақ құжат жүзінде азаматтық-құқықтық келісім болса – бұл заңбұзушылық”.
