Қарағанды қаласындағы инфекциялық орталықта кішкентай науқастың шетінеуіне байланысты ресми тергеу басталды, деп хабарлайды Alash.kz.
Денсаулық сақтау министрлігі бұл жағдайды ерекше бақылауға алғанын мәлімдеді. Алдын ала мәліметтер бойынша, бала ауруханаға сырқаты басталғаннан кейін екі күн өткенде түскен. Жағдайының күрт нашарлауына байланысты ол бірден жансақтау бөліміне жатқызылған болатын.
Дәрігерлер жүргізген зерттеулер нәтижесінде баланың ағзасынан вирустық, бактериялық және саңырауқұлақ инфекциялары бірдей анықталған. Емдеу процесін науқастағы айқын иммундық тапшылық жағдайы қиындатып жіберген. Медицина қызметкерлерінің айтуынша, еліміздің жетекші мамандарының қатысуымен консилиумдар ұйымдастырылып, тіпті ЭКМО аппаратын қолдану мүмкіндігі де талқыланған. Алайда медициналық көрсеткіштер мен қарсы көрсетілімдерге байланысты аталған құрылғыны қолдану тиімсіз деп танылды.
Министрлік мамандары ем шараларының хаттамаға сәйкестігін және уақтылы көрсетілгенін тексеруге кірісті. Медициналық ұйымдағы жабдықтар мен дәрілік заттардың сапасы да назардан тыс қалмайды. Қазіргі уақытта қайғылы оқиғаның нақты себептері мен жауапты тұлғалардың іс-әрекетіне құқықтық баға беру үшін тиісті сараптамалар тағайындалды.
Тексеру қорытындысы бойынша министрлік қосымша ақпарат беруге уәде етіп отыр.
