Жаңаөзенде мешітте өрт шығып, салдарынан кішкентай бала зардап шекті. Бұл туралы Lada.kz хабарлады, деп жазады Alash.kz ұлттық порталы.
Маңғыстау облыстық төтенше жағдайлар департаментінің мәлімдеуінше, 6 наурыз күні 17:54 шамасында Маңғыстау облысы Жаңаөзен қаласының Шанырақ шағын ауданындағы мешіт аумағында өрт шықты.
“Жаңадан салынған қалалық мешіт дәлізінде жатқан 40 шаршы метрлік кілем өртенді. Жалпы ауданы – 350 шаршы метр. Өрт сағат 18:10-да түгелдей сөндірілді. Қазіргі уақытта өрттің шығу себебі анықталып жатыр”, – делінген хабарламада.
Өрт салдарынан 2013 жылы туған жасөспірім зардап шекті. Дәрігерлер оның екі құлағы, беті, мойны, екі қолы, бел аймағы және жоғарғы тыныс алу жолдарының I-II-III дәрежеде термиялық күйік шалғанын анықтады. Денесінің 15-17%-ы зақымданған.
Жаңаөзен көпсалалы қалалық ауруханасының мәліметінше, баланың жағдайы ауыр, әзірге оң өзгеріс байқалмайды. Қазіргі таңда оған қарқынды инфузиялық және шокқа қарсы терапия жүргізілуде.
