Қазақстанның құқық қорғау органдары 1986 жылғы Желтоқсан көтерілісіне қатысқан тұлғалардың намысына тиіп, қорлау мазмұнында пікір білдірген әйелге қатысты тергеу амалдарын бастады, деп жазады Alash.kz.
Аталған факті бойынша қылмыстық іс қозғалып, күдікті ретінде танылған П. есімді азаматша ұсталып, полиция басқармасына жеткізілді. Қазіргі таңда оның заңға қайшы әрекеттерінің мән-жайы анықталуда.
Қылмыстық істің қозғалуына Threads әлеуметтік платформасындағы Виолетта Паршина есімді қолданушының жарияланымы негіз болды. Ол 1986 жылы Алматыда орын алған тарихи оқиғалар туралы ақпараттың астына ұлттық араздықты қоздыратын және қатысушыларды кемсітетін ауыр сөздер жазған. Бұл жазба қоғамда үлкен резонанс тудырып, желі қолданушылары тарапынан тиісті жаза қолдану туралы көптеген талаптар түскен болатын.
Полиция департаментінің мәліметінше, қазіргі уақытта күдіктінің әрекетіне Қазақстан Республикасының қылмыстық заңнамасына сәйкес сараптама жасалып, құқықтық баға берілуде. Істің егжей-тегжейі мен тергеу барысы құзырлы органдардың жіті бақылауына алынды. Ұлттық намыс пен тарихи құндылықтарға нұқсан келтіретін кез келген әрекеттің заң аясында жауапсыз қалмайтыны ескертілді.
