АҚШ Президенті Дональд Трамп пен Ресей басшысы Владимир Путин телефон арқылы тілдесіп, халықаралық күн тәртібіндегі маңызды мәселелерді қарастырды, деп жазады Alash.kz.
Тараптар Иран төңірегіндегі шиеленісті бәсеңдету және Украинадағы қақтығысты дипломатиялық жолмен реттеу барысын талқылаған. Кремльдің баспасөз қызметінің мәліметінше, бір сағатқа жуық уақытқа созылған бұл әңгіме конструктивті әрі іскерлік форматта өткен. Мемлекет басшылары алдағы уақытта да тұрақты байланыста болуға келісті. АҚШ Президенті Ресей басшысымен болған сұхбатқа оң баға беріп, оның Таяу Шығыстағы мәселелерді шешуге қосқысы келетін үлесін жоғары бағалаған.
Әңгіме барысында Владимир Путин Ирандағы ахуалды реттеу бойынша өзіндік көзқарасын білдірді. Оның айтуынша, бұл мәселеде Парсы шығанағы елдерінің басшыларын келіссөздерге тарту тиімді болмақ. Өз кезегінде Дональд Трамп АҚШ пен Израильдің бірлескен операциясы аясындағы ағымдағы жағдайға тоқталды. Сонымен қатар, Америка басшысы Украинадағы қақтығысты жеделдетіп шешуге мүдделі екенін жеткізді. Бұған жауап ретінде Ресей Президенті тараптардың қақтығысты реттеудегі көмегі мен ықпалы үшін алғыс білдірді.
Күн тәртібіндегі тағы бір маңызды мәселе — Венесуэладағы жағдай болды. Тараптар бұл елдегі ахуалды әлемдік мұнай нарығындағы тепе-теңдік тұрғысынан қарастырды. Бұл сұхбат екі держава арасындағы халықаралық шиеленістерді шешудегі алғашқы дипломатиялық қадамдардың бірі ретінде бағаланып отыр.
